God glid på Gamlesætra

Søndag gjekk den første av i alt fire Gulbrandsøy skicupar av stabelen på Gamlesætra. Arrangørane er kjempefornøgd med oppmøtet på heile 77 deltakarar.
– Dette blir vel det meste som har deltatt på fem-seks år, kan Gunnar Stusdal fortelja.
Saman med skilaget i Eikanger idrettslag står han i spissen for arrangementet.

Første gong
Skicupen, som har blitt ein årleg tradisjon for mange, fekk også i år med seg fleire ferske skiløparar.
– Eg likar å stå på ski, fortel Emma Kvamme Kalnes (3).
Jenta, som berre er tre år gamal, fekk ski i desember og har utnytta snøen godt.
For henne var det første gongen ho var med på eit skirenn. Sjølv om ho berre har hatt ski på beina i vel ein månad klarte ho å gjennomføra løpet, som var på 500 meter.
– Eg datt litt, men det var gøy, smiler ho etter å ha passert mållinja.

Fint arrangement
– Eg synes det er kjempekjekt at dei arrangerer dette, seier mor til Emma, Linda Kvamme.
Ho prøver å ta med seg borna på dei fleste skirenna som vert arrangert i distriktet.
– Borna synes det er veldig gøy å stå på ski, så dette er ein viktig tradisjon for oss, fortel Kvamme.
Ved startlinja står Ingve Nævdal (7) og ventar på at det skal bli hans tur til å gå.
– Det er vanskeleg å forklara kva som er så kjekt med ski, men eg trur det må vere det å skli fort, fortel han.
Og når startskotet går er det lett å sjå at han har planar om å halde god fart gjennom løypa.

Les meir og sjå fleire bilete frå skirennet i avisa tysdag 19. januar.