Heidra av «halve bygda»

– Eg må støtta Strilen-redaktøren i at alle må pussa tennene godt i kveld! kom det med eit smil frå ordførar Astrid Aarhus Byrknes.

Ho var glad for å få gratulera Kløvheim Skulekorps med tittelen «Nordhordlands beste lag», kåra av Strilen sine lesarar.

At ordføraren var opptatt av musikantane sine tenner, har ei munter forklaring. Musikantane vart nemleg heidra med snop opp og snop i mente.

Posar med egg
Først dukka Strilen-redaktøren opp for å gratulera korpset. Han hadde med seg blant anna diplom, som vart overlevert til korpsleiar Norunn Åkernes Jordal og dirigent Magnus Brandseth.

– Korpset kneip sigeren med bra margin, etter at det ei stund var jamn kamp med «Strilongane» frå Rossland, fekk korps og kring 70 frammøtte vita.

Som premie til korpset fann Strilen ut at det ikkje passa så godt med ein «kjedeleg» blomsterbukett. Så frå ein Rema-1000 pose og ein Kiwi-pose henta redaktøren fram to store påskeegg fulle i snop.

Då ordføraren fekk ordet, måtte ho vedgå at «dette vert nokså komisk». Frå ein ICA-posen drog ho opp si helsing til korpset - kva anna enn eit fullt påskeegg! Nummeret var eit hakk mindre enn egga frå Strilen, men ein beæra dirigent tok smilande imot.

Både koprsleiaren og dirigenten takka bygdefolket for utruleg god støtte, både ved avstemminga og elles.

– Spel Kløvheim, spel!
– Me vil høyra dekå spela! forlangte Kløvheim-patriot Ivar Nesbø frå tilhøyrarbenk i gymsalen på skulen.

Dermed vart bygdefolk og andre frammøte, imponerande 70 personar, servert eit godt døme på Lindås sine solide korpstradisjonar.

For eit par år sidan takka Knut Harald Rydland av som mangeårig Kløvheim-dirigent. Då var det og ein del musikantar som gjekk av for alderen, så no er snitt-alderen nede i 13 år. Men korpset hevdar seg både i Hordablæsten og på andre måtar, og aspirantane står i kø.

– Dette var flott. Det passa veldig godt med ei slik kåring når Lindås har vore med i finalen som ein av landets beste kultur-kommunar, syntest ordføraren.

Resultat:

Fedje Teaterlag                   87 stemmer
Kløvheim skulekorps           447 stemmer
Lindås Ungdomslag             85 stemmer
Lindåstunet                        79 stemmer
Nordhordland Røde kors      140 stemmer
Nordhordland Turlag            71 stemmer
Strilongane                        332 stemmer
Årås sanitetslag                  51 stemmer