Hoppande glade for ny bane

– Det har vore litt av eit liv på trening i det siste. Borna er veldig ivrige og den nye bana gjer kvardagen vår mykje kjekkare, kan Heidi Marås fortelja.

Søndag inviterte turngruppa i Radøy idrettslag til basar til inntekt for ei ny tumblingbane.

Tumblingbana kostar 100.000 kroner. Etter å ha jobba for dette i lengre tid, har klubben endeleg våga å kjøpa ei. Den måtte sjølvsagt både visast fram og testast ut av unge turnarar på basaren.
 
Tryggare og meir effektiv trening
Idrettslaget har to turngrupper- ei på Sæbø og ei på Sletta. Begge gruppene skal få nytta bana. Dei som turnar på Sæbø har alt fått testa den nokre gongar og tilbakemeldinga er at dette er supere greier. Tumblingbana er ei lang oppblåsbar bane som gjer det lett å spretta og tryggare og mjukare å landa.

– Dei fleste turngrupper rundt om kring har slike matter og det er også det som møter ungdommane våre når dei er rundt på ulike turnarrangement. Ei slik matte er tryggare og sidan den er så stor gjer den også treninga med større grupper meir effektiv, seier Marås.

Det fekk også foreldre, søsken og besteforeldre sjå då nokre av turnarane stilte seg på rekkje og demonstrerte høge hopp, salto og anna gøy.
 
Sponsa av lokale
Til saman er det rundt 40 born som går på turn på Sæbø og 80 på Sletta. Turngruppene gjev eit tilbod til born og unge frå 4 til 18 år og lokale bedrifter som Fiskenett og Stevnebø har vore med å sponsa idrettslaget slik at dei skulle få råd til bana. I tillegg gjekk inntektene frå basaren på skulen denne helga til føremålet, og det møtte opp bra med folk.

– Me har fått veldig mange flotte gevinstar frå lokale butikkar og privatpersonar og oppmøtet er over all forventning. Me har ikkje arrangert ein slik basar tidlegare og hadde ikkje venta på langt nær så mykje folk. Eg er redd me kjem til å gå tom for kaffimat, seier Marås.
 
Vann sjal og leggvarmarar
Stemninga blant borna i salen tydde også på at gevinstane fall i smak.

Lea Cecilie Grandahl (7), Nathalie Sæbdal og Jeanette Grandahl hadde i alle fall vinnarlukka med seg.

– Me har vunne sokkar og leggvarmarar og eit sjal, kunne dei fortelja.

På eit bord litt lenger borte sat det også tre glade vinnarar.

Karina Andersen Øren (10) kunne visa fram ein stilig servietthaldar som ho hadde vunne.
– Det er til og med serviettar med, sa ho.

Elise Chun Skråmestø og Sander Wii Skråmestø hadde fått pennar, raude sokkar og ei rosa veske.

– Me har ikkje vunne noko, men farmor har vunne og så har ho gitt gevinstane til oss på deling, får Strilen vita.