Jokeren som kan opna for skulenedlegging

Det kom fram i formannskapet torsdag, der Leif Sleire gjekk ut og opplyste at Høgre er splitta, og at han støttar delar av rådmannen si tilråding.

Festo og Eikanger skular er klart i faresona, medan Myking kan overleva på bekostning av Kløvheim.

Avrøystinga om Lindås sin skuleplan er utsett i formannskapet, men debatten avdekka at det kan vera fleirtal i kommunestyret for skulenedlegging.

– Det har vore jobba febrilsk dei siste vekene for å få til eit kompromiss både internt i Høgre og i fleirtalet, men det har ikkje lukkast. Det har gått ut over både nattesøvn og familie, men det er noko av baksida av medaljen ved å vera fritidspolitikar, sa Sleire.

Han signaliserte at han kan støtta delar av rådmannen si innstilling, blant anna å leggja ned Festo skule. For Eikanger er han meir usikker.

Sleire antyda og at det bør vurderast om Kløvheim kan verta nedlagd til fordel for Myking skule. Det ønskjer han at rådmannen må sjå nærare på, blant anna ut frå skuleskyss.

I debatten kom det som venta fram at Frp som utgangspunkt vil støtta rådmannen si innstilling om å leggja ned fire skular. Frå Ap kom det og sinal om støtte for rådmannen sitt opplegg, men ikkje så tydeleg som frå Frp. I ein e-post til Strilen fredag har Sveinung Valle reagert på måten han er sitert på, avdi han kom med framlegg om utsetjing for å sjå skulesaka i samanheng med drøfting av budsjett og økonomiplan på Voss.

«Dette skal me ta stilling til på Voss- og Ap er open for fleire alternativ- også 0 alternativet. Dette fordi (også sagt i møtet), at det er uheldig at ei så viktig sak vert avgjort med knappast mogeleg margin-noko som kan føra til uro og omkampar i lang tid. Ber deg om å nyansera det som sto i Strilen.no til parirutgåva lørdag», skriv Valle i e-posten fredag.

Frp og Ap har 15 av 31 i kommunestyret. Dermed trengst det etter alt å dømma støtte frå ein eller fleire frå fleirtalskoalisjonen om det skal verta nedlegging. Venstre og SV er venta å gå mot nedlegging.