Klubba for nedlegging av skule

Det er klart etter at Meland kommunestyre klubba neste års budsjett, onsdag kveld. Der vert rådmannen og formannskapet si tilråding stadfesta:

Flatøy skule vert lagt ned frå hausten av, og elevane vert oveførte til Sagstad skule.

Men vedtaket vart ikkje gjort utan protestar. Torstein Flatøy (Krf), Marie Morken (Samarbeidslista) og delar av arbeidarpartigruppa argumenterte mot eit budsjett som la opp til skulenedlegging.

– De vil ta frå oss det beste godet me har. Skulen er det viktigaste samlingspunktet i bygda, sa Flatøy i eitt innlegg frå talarstolen.

– Nokon har stilt spørsmål om det er lovleg å leggja ned ein skule som ein konsekvens av eit budsjettvedtak. Eg kan ikkje svara på det, men me er eit gruppe som har diskutert litt på gangen. Dersom kommunestyret går inn for eit vedtak som inneber skulenedlegging, vil me be om ei lovlegheitskontroll av dette. Me vil ha ei grundig vurdering av prosessen, sa Morken.

Bygdefolk frå Flatøy møtte mannsterke for å få med seg debatten og visa sitt engasjement, men dei gjekk skuffa heimatt. Mange politikarar gjekk på talarstolen og sa at det ikkje var med lett hjarte dei gjekk inn for vedtaket, men dei argumenterte og for at ei skulenedlegging er nødvendig for å få budsjettet i hamn.

Les meir om debatten i papiravisa laurdag.