Kongegull til Eilif B. Løtveit

Troldsalen på Trold­­­­haugen var fullsett og gratulantane stod i kø då Eilif B. Løtveit (64) onsdag kveld fekk overlevert Kongens fortenstmedalje i gull av fylkesmann Svein Alsaker.

Løtveit har dei tolv siste åra vore tilsett på Troldhaugen, Nina og Edvard Grieg sin heim i Fana, men dei fleste i Nordhordland kjenner han nok som ein engasjert og kunnskapsrik konferansier på konsertar og andre arrangement.

Ja-menneske
Eilif B. Løtveit er utdanna lektor med faga nordisk, tysk og kunsthistorie, og i 20 år hadde han arbeidsplassen sin på Lindås gymnas i Knarvik. Men i 1996 begynte han på Trold­haugen, i første omgang i ei prosjektstilling knytt til Harald Sæverud-jubileet i 1997.

Han var og med på å tilretteleggja Sæverud sin heim Siljustøl som museum og konsertlokale. Frå 1998 har han vore fast tilsett som museums­konsulent på Trold­haugen.

I talane etter overrekkinga vart det nokre ord som gjekk att: Entusiasme, formidlingsevne og ja-menneske.

Herr Troldhaugen
Ein viktig del av jobben på Troldhaugen er å vera omvisar i villaen til Nina og Edvard Grieg, og mange trekte fram Løtveit sin eineståande evne til å skapa interesse for Grieg sin musikk, men og evna til å gjera komponisten levande gjennom å fortelja anekdotar frå Grieg sitt liv.

– Du har nesten vorte ein del av inventaret på Trold­haugen, på linje med plysjsofaene og bilda, vart det sagt i helsingane.

Ord og musikk
Eilif B. Løtveit var med på å skipa Musikken Venner Nord­hordland i 1982, og han var i mange år leiar der. Og utallige er konsertane deira han har leia.

Han har og vore leiar i Troldhaugens Venner og vore ei drivkraft i konsertbyrået «Musikkforum-Bergen».

Men han er også oppteken av litteratur, noko som kom godt fram dei åra han var norsklærar på Lindås gymnas.

Tyskland
Det er ikkje berre lokalt ein har fått oppleva Løtveit sitt engasjement. Han har i ei årrekkje vore engasjert i prosjektet «Grieg in der Schule» i Tyskland, og også den norske ambassaden i

Berlin har nytta han i arbeidet sitt. Difor vart det lese opp helsingar både frå Utandriksdepartementet og frå kunstvener i Tyskland under markeringa i Trold­salen. Også norsk-tysk venskapsforeining i Bergen, der Løtveit er leiar, helsa.

Konsert
Festkonserten i Troldsalen vart innleidd med musikk og diktopplesing av profesjonelle utøvarar, og Løtveit sjølv takka varmt både for medaljen og den flotte festkonserten.

– Eg kjenner meg privilegert som får arbeida med det eg interesserer meg for, og det er kjærleiken til kulturen som er drivkrafta. Å formidla dette til andre, gjev meg glede. Denne gleda er mi belønning. sa Løtveit.

Og karakteristisk nok kunne han fortelja at onsdagen var Mozart sin fødseldag.

– I år er det 254 år sidan han vart fødd, sa mannen som er eit levande leksikon når det gjeld musikk og litteratur.

Då passa det fint at festkonserten vart avslutta med «Abendempfindung» av nettopp Mozart, framført at baryton Per Vollestad og pianist Ingunn Ådland.
Sist­nemnde hadde også vore med i festkomiteen saman med Reidar Storaas og John Hovland.