Kor skal dette enda?

Dei dansa samba, song drikkeviser,  spelte blokkfløyte, kledde seg ut og flørta med dommarane.

Alt var lov då ni lokale kor i dag møttest til historias første Koriade arrangert av Seim Songkor.

I to og ein halv time serverte dei ni kora kvar sine minishow for å få første napp i den nydreia vandrenoten laga spesielt for Koriaden.

Dei påmelde kora var, Lindås Songlag, Måltrastena frå Meland, Radøy damekor, Songkoret Spleis frå Masfjorden, Songkoret Vågen frå Meland, Songlaget Alvidt/Manger frå Alversund, Hjelmås Mannskor og Seim Songkor.

Trass i alle forsøka på å smørja dommarane, nytta det ikkje å få noko ut av dei etter den uhøgtidelege konkurransen.

Med fjes som barka pokerspelarar var einaste kommentaren at det var fleire kor som hadde overraska.

Utover kvelden skal dommarane samanlikna notatane sine medan kora samlar seg til middag og sosialt samvær.

Kven som stikk av med vandrenoten og pokalane vert dermed ikkje avgjort før seinare i kveld.