Kulturpris til driftige brør

Det var ein stolt Masfjord-ordførar som tok ordet under Kraftspela i Matre i helga. Utdelinga av kulturprisen har vore ei årleg hending i 22 år, men sjeldan har nokon vorte så overraska som i år.

Arbeider i det stille
Brørne Olaf og Ragnar Sleire trudde knapt det som hende. I heile sitt liv har dei jobba hardt for å halda slektsgarden på Sleire i hevd. Dei har aldri stukke seg fram og bede om å få noko merksemd. Men arbeidet dei har gjort i det stille, vert lagt merke til.
– Olaf og Ragnar Sleire er tildelt kulturprisen for arbeidet med tradisjonell landbruksdrift. Dei har ivaretatt kulturlandskapet med tradisjonelle metodar, sa ordførar Håkon Matre, og gav karane blomar, diplom og ein sjekk på 10.000 kroner.
Det passa godt i 2009, som er peika ut til å vera det nasjonale kulturminneåret.

Kjærleik til jorda
Ordføraren peika på at dei to gjennom sin veremåte og sin innsats basert på tradisjon, omtanke og kulturvern har vist omverda korleis forfedrane i Masfjorden levde sin kvardag gjennom året. Kjærleiken til jorda og dyra kjem også tydeleg fram i filmen som vart laga om dei to for nokre år sidan.
Filmen, som har fått namnet Odelsgutane, var ein del av programserien Faktor på NRK.

Trufast arbeidskamerat
Gjennom programmet fekk folk i heile landet eit innblikk i kvardagslivet til brørne og den trufaste arbeidskameraten «Tuva». Då filmen vart laga hadde hesten passert 34 år, men merra var framleis med Olaf og Ragnar i det daglege arbeidet på garden. Saman har tre trekt utallige tømmerlass, kjørt ut møk, harva og fått materialar og utstyr til fjells.
Karane brukte også hesten då dei rydda i Markhusdalen etter den store nyttårsorkanen på 1990-talet. Dei brukte fleire år på jobben og turgåarar kan framleis nyta godt av arbeidet deira.
– Dette er den største æra eg har fått i heile mitt liv, sa Olaf på vegne av dei to, som også fekk vera filmstjerner for ein kveld.
 Etter premieutdalinga, vart nemleg filmen om dei to vist i kinosalen, med Ragnar og Olaf som heidersgjestar. Det hausta stor applaus.

Næringspris til skisenter
Også Næringsprisen i Masfjorden vart delt ut under kraftspela. Det skjedde for andre gong. I år var det Stordalen skisenter som fekk prisen. Arne Berg kunne, som representant for senteret, ta imot diplom og pris.

– Stordalen Skisenter har med si raske etablering og utvikling, skapt eit populært tilbod både for Masfjordingar og tilreisande, sa ordføraren og fortalde om ei besøksauke frå 4000 til 6000 menneske på eit år.
– Stordalen Skisenter AS er eit flott «fyrtårn» for Masfjorden og bidreg stort til eit positivt omdøme av kommunen, fekk publikum høyra. Det vart også godt mottatt hjå tilhøyrarane.