Laga kaos på buss-stopp

– Sjå kor fullt det er her no. Det er 62 elevar på barneskulen i tillegg kjem elevar som skal på ungdomsskule, vidaregåande skule og andre busspassasjerar. Det er sikkert 80-90 menneske her no. Dette er ikkje noko festleg og slik kan det verta kvar dag, seier Britt-Iren Birkeland i FAU ved Flatøy skule

– Skummelt
Klokka 08.00 i går møtte elevar på Flatøy skule opp på busstoppen for å visa korleis kvardagen deira kan verte om skulen vert lagt ned.
Formannskapet i Meland har gått inn for å senda Flatøy-elevane med buss til Sagstad skule. Det vekkjer sinne og frustrasjon i bygda.
Demonstrantane stilte i refleksvestar med bodskapen «Ikkje legg ned Flatøy skule». Dei var godt synlege i morgonrushet
– No er me mange vaksne her som passar på. Men eg synest likevel det er skummelt. Eg tenkjer med gru på kva som kan skje om eit av borna snublar eller forvirrar seg ut av fortauet. Dei kan jo hamna under ein buss, seier FAU-leiar Vibecke Samuelsen.

Redd for veslesøstera
Fleire av borna på staden var lite lystne på ny skuleveg.
 – Det går bra i dag, men eg har ikkje lyst å stå her kvar dag. Det er mykje folk og så er det kaldt og mørkt. Eg har ei søster som er eitt år yngre enn meg. Eg har ikkje lyst til at ho skal stå her åleine, seier Ida Herland (7).
Heller ikkje Ingrid (9) og Ida S. (7) og Sanna (7) synest det var moro å stå på busstoppet.

Fryktar mørke og snø
Fleire foreldre fortalte at dei vil vurdera å kjøra borna til bussen i vinterhalvåret.
– Eg tek bussen frå stoppet her sjølv for å koma meg på jobb. Ein vinterdag gjekk eg på gangvegen då det kom ein brøytebil oppe på E39. Plutseleg vart eg slengt i bakken. Eg vart dynka i våt slaps og snø og gjekk rett i asfalten. Tenk om det hadde skjedd med eitt av borna her. Eg tru ikkje at det er den einaste gongen brøytebilane har sendt snø over autovernet der, seier Anders Ljung.
Han likar ikkje tanken born ned i seksårsalderen skal stå eit overfylt busstopp i mørke og regn.
FAU har sjekka bussrutene og telt kor mange bussar som er innom Flatøy i tidsrommet 07.55 til 08.15. Det har kome fram til at det er snakk om 13 bussar. – Me vil ikkje senda borna våre ut i eit slikt kaos, seier Vibecke Samuelsen.

 – Grei markering
Demonstrasjonen varte vel 15 minutt og Foreldreutvalet hadde invitert lokale politikarar til å koma å sjå. Ordførar Nils Marton Aadland kom for å slå av ein prat med demonstrantane.
– Det er mykje folk her. Det kjem ikkje som ei overrasking. Flatøy-bygda er kjent for eit stort engasjement. Det er positivt at folk står på for det som opptek dei. Eg synest det er greitt at dei markerer si meining på denne måten, seier ordføraren som var med då formannskapet gjekk inn for skulenedlegging frå hausten 2010.