Marøy toppskårar for Løv-Ham

Søndag kom dei to siste måla frå den målfarlege radværingen, i ein kamp der Løv-Ham vann 3-1 borte mot topplaget Ranheim.

Marøy ordna både 1-0 og 2-0 før Ranheim reduserte, men bergenslaget var sterkast og vann til slutt 3-1.

Før helga ramla Løv-Ham ned på nedrykksplass. I samband med at Lyn er konkurs og laget ute av serien, vart alle poeng i kampar mot Lyn strokne. Det slo dårleg ut for Løv-Ham, men med full pott mot serietoar Ranheim er laget igjen oppe på sikker plass i Adeccoligaen.

Marøy har i tillegg til måla i serien, også vore målfarleg for Løv-Ham i cupen. Der var laget med heilt til kvartfinalen, der det vart tap for Sogndal. I runden før var Marøy sentral i kampen der løvene slo Aalesund ut av NM. Marøy laga 1-0 på eit skot frå over tretti meters hald.

Marius Helle frå Bryne har laga mest mål så langt i år i Adeccoliagen, med femten nettkjenningar. På landslista er Marøy på ein åttandeplass med sine seks mål.

For Løv-Ham er toppskårarlista slik: Sindre Marøy (6 mål), Arve Walde (3 mål), Kim Rune Hellesund (2 mål), Matias Møvik (2 mål), Fredrik Haugen (1 mål), Erlend Storesund (1 mål), Mats Kaland (1 mål), og Kevin Dure (1 mål).