Massivt nei til vindkraft

Utbyggjarane fekk lite å gleda seg over på det opne møtet på Eivindvik Fjordhotell. Nesten alle som tok ordet frå publikum, markerte motstand mot planane om vindkraft i kommunen.

Urørd natur vart trekt fram som ein av kommunen sine fordelar, og ei vindkraftutbygginga vil gjera slutt på det, vart det sagt. Også for reiselivet vil vindmøller vera negativt, meinte fleire.

Det vart også uttrykt frykt for at eigedomsprisane på hus og hytter vil falla viss der kjem vindturbinar i nærleiken.

Folk forventa heller ikkje særleg mange arbeidsplassar ved ei utbygging.

Det var NVE (Noregs vassdrags- og energidirektorat) som arrangerte møtet for å presentera konsekvensutgreiingane for dei tre prosjekta som det no er søkt om konsesjon for: Sandøy, Brosviksåta og Dalsbotnfjellet. Representantar for utbyggjarane, SAE Vind AS og Zephyr AS, var til stades og gav ein kort presentasjon av kva konklusjonar konsekvensutgreiingane hadde kome fram til.

Frammøtet var svært godt, truleg rundt 150 personar, og engasjementet hos dei som tok ordet, var stort. Også Kurt Oddekalv frå Norges Miljøvernforbund var til stades på møtet og gav klart uttrykk for at han ikkje hadde noko til overs for vindmøller i Gulen.

Det kjem ein meir utfyllande presentasjon frå møtet i avisa torsdag.