Miljøpris til idretten

– Det er positivt at idretten engasjerer seg når det gjeld kjeldesortering, sa Sveinung Kråkås då han delte ut NGIR sin miljøpris for 2010 i Kjevikdalen i går.

Kråkås, som kjem frå Solund, er leiar i NGIR sin representantskap, og prisen vart delt ut i samband med møte i representantskapen.

Miljøprisen vart i år delt mellom fem vinnarar: Austrheim Cup, Kvernbit Cup i Meland, Knarvikmila, NBK Cup og NBK-Tine Fotballskule. Alle fem arrangementa har på ulike måte sett miljø og kjeldesortering på dagsordenen. Kvar av vinnarane fekk 6000 kroner, pluss ein diplom laga av Solveig Serigstad Hauge.

Når mange

– De når mange og involverer mange, sa Kråkås.

Vinnarane har lært opp eigne funksjonærar til kjeldesortering, i tillegg til at dei når ut til publikum med informasjon.

At idretten viser miljøansvar, kan og ha ein oppdragande effekt, særleg overfor dei unge.

Arbeidet har pågått over fleire år.

Skulekorpset

– Eg vil dela æra med Knarvik skulekorps, for det er dei som har stått for kjeldesorteringa under Knarvikmila, sa Helge Brekke etter utdelinga.

– Kjeldesorteringa har gått betre år for år, men me ser at me har ein jobb å gjera med bergensarane, seier Trond Egil Soltvedt, som tok mot prisen for Kvernbit Cup.

– Me må nok vedgå at me ikkje driv systematisk kjeldesortering under Austrheim Cup, men me set ut rikelege med boskorger, og me prøver å visa miljøengasjement på andre måtar, seier Kjell Tor Karlsen til Strilen.

Sjette pris

NGIR sin miljøvernpris vart i år utdelt for sjette gong. Første gongen var i 2003, men det er no tre år sidan prisen sist vart delt ut. Prisen skal gå til lag, verksemder eller enkeltpersonar som har gjort ein ekstra innsats for å ta vare på miljøet.

Juryen hadde ikkje fått inn forslag på prisvinnarane, men fann sjølv fram til at idretten fortente prisen i år.