Open kamp om skulenedlegging

Leif Sleire (H) står førebels åleine om å gå inn for samanslåing av Myking og Kløvheim skular. Men det endelege utfallet i kommunestyret er ope, viser tilrådinga frå formannskapet.

Vinn rådmannen sitt framlegg gjennom, kan Hege Bårdsen, Anne Marie Fanebust og andre foreldre frå Kløvheim pusta letta ut for oppretthalding av Kløvheim skule. Både dei og utsendingar frå Myking var på plass på tilhøyrarbenk då formannskapet torsdag ettermiddag skulle koma med si tilråding om skuleplanen og dermed fleire barneskular si framtid.

– Det er klart me er spente, så me må følgja med, seier Hege Bårdsen, som hadde med seg 10 månader gamle Johanne.

Om Kløvheim kan verka blant dei sikre, påpeika ordføraren på at det er avrøystinga i kommunestyret 26. november som avgjer. Og alt tyder no på at nokre skular i Lindås vert nedlagde, etter at formannskapet delte seg i to hovudblokker.

Frp og Ap med totalt fire røyster står samla bak framlegget om å kutta talet på barneskular med fire, slik rådmannen rår til: Festo, Eikanger, Myking og Eikanger. I kommunestyret utgjer partia 15, ein for lite til å ha fleirtal.

Fire politikarar går og inn for det såkalla 0-alternativet - ikkje nedlegging av skular: Ordførar Astrid Aarhus Byrknes (KrF), Jostein Hellestveit og Anna K. Valle i Sp og Nils Træland i Høgre.

– Me vil ikkje vera med på ei utarming av bygdene til fordel for sentrale strok, sa Jostein Hellestveit.

Leif Sleire (H) beklaga at han hadde uttalt seg uklart i førre møte i formannskapet, blant anna rundt Eikanger skule. Hans utgangspunkt er at Skodvin og Eikanger ikkje skal leggjast ned og at Myking og Kløvheim vert slått saman til ein skule. Ei sak om plassering vil Sleire ha tilbake frå rådmannen.

Rådmannen streka på nytt under at han vil ha eit stort kvalitetsløft for attverande skulebygg ved å leggja ned fire skular.

– Frå verneombod og andre er det med jamne mellomrom klager på arbeidsmiljøet ved skulane. I budsjetta viser det set at politikarane gong på gong utset å rusta opp fleire av skulane. Men når ein vil retta opp arbeidstilhøva, men det fører til nedleggingar, er det lenger ikkje så viktig med utbetringane av skulane det gjeld. Då kan dei venta med å verta opprusta, sa rådmann Øistein Søvik.