– Opptur med lesarpris

Det seier Lindås sin avtroppande varaordførar Bjarte Vatnøy etter at Strilen−lesarane kåra han til «Beste politikar».

I oktober var det noverande og tidlegare politikarar som var oppe til dyst i Strilen si uhøgtidelege kåring. Også resten av året i Strilen sitt jubileumsår vert det kåringar kvar månad.

– I førre veke var eg inne og såg at eg hadde 254 stemmer og Astrid (Aarhus Byrknes) hadde 255, etter at Strilen skreiv på nettsida om «Tett løp» i kåringa. Så reiste eg på hjortejakt i Gulen og kunne ikkje følgja så nøye med, seier Vatnøy.

SMS−gratulasjonar
– Vart det nokon fangst i skog og mark?

– Eg skaut ein flott kronhjort, ein 13−taggar i valdet me har tilgang til, opplyser Vatnøy.

Då han kom heimatt fredag, tok han til å få SMS−meldingar med gratulasjonar.
– Eg må berre få takka alle som har røysta på meg, seier Vatnøy. Han har drive PR blant anna ved å gjera merksam på avrøystinga på sida si på Facebook.
– Eg synest det var viktig å få blest om avrøystinga, som er eit bra initiativ frå Strilen. For meg vart sluttresultatet ei gledeleg overrasking.

– Kanskje spesielt etter eit labert lokalval?
– Eg trur ikkje at det har vore sympatistemmer. Det eg har opplevd i ein del politiske saker, er å verta oppringt av folk som har bede om hjelp. Samstundes som folk seier dei tilhøyrer andre parti, seier dei at dei trur Frp kan hjelpa dei betre. Det har vel spesielt vore i strandsone−saker, der deira parti er meir restriktive enn me er! seier Vatnøy med eit smil.

Nedtur vart opptur
Han vedgår at valet i Lindås vart ein personleg nedtur.
– Difor vart denne prisen ei oppmuntring til å stå på vidare, synest Vatnøy.

Elles saknar han framlegg på ein del andre og markerte lokale politikarar.
– Eg hadde venta namn på lista som Ole Lysø, Olav Steinar Namtvedt, Håkon Matre, Gisle Handeland og stortingspolitikarane Tove Linnea Brandvik og Gjermund Hagesæter. Eg synest Nordhordland har ei god breidde av politikarar. I det selskapet som deltok, var eg i alle høve glad for å vinna, seier Vatnøy.

– Vert det tøft å løfta partiet att ved neste lokalval?
– I eit lokalval får ein som regel «som fortent». Me har sikkert gjort nokre feil. Sjølv har eg vald å ikkje vera konfliktsky. Eg har engasjert meg i vanskelege saker også. Som lokalpolitikar må ein stå for noko. I skulesaka meiner eg framleis me gjorde det rette valet. Men kjem det opp nye løysingar frå andre parti, vil me vera med å diskutera dei. Målet vårt er å få betre oppslutning om fire år, og eg håpar me finn fram til saker som kan gje oss større støtte, seier Vatnøy.

Slik vart resultatet:

«Beste politikar»
Kåra i september av Strilen sine lesarar.

Stemmene fordelte seg slik:

Jostein Vike                    24
Kari Skår Sørheim           40
Astrid Aarhus Byrknes    632
Arnold Tveit                   201
May−Eva Sandvik            45
Helge Dyrkolbotn             51
Bjarte Vatnøy                917
Kari Utkilen                     30

Totalt 1940 stemmer