Pengedryss til gode føremål

Eller forresten, gløym pennen og finn fram datamaskina. No er det nettet som gjeld, også for kommunale kulturmidlar. På nett finn du informasjon om dei ulike som gjev pengar, og du ordnar også sjølve søknaden via tastaturet.

Den første søknadsfristen som passerer, er fristen for å søka om kroner frå Sparebankstiftelsen DNB Nor. Denne stiftinga er nest største eigar av banken DNB, og utbyttet frå aksjane går som støtte til allmennyttige føremål, også i Nordhordland.

I siste tildelingsrunde i 2011 fekk Lindås Ungdomsklubb 43.000 til kanoar og anna utstyr, Eikanger bygdelag 20.000 kroner til tilrettelegging av turstiar, og UL Nybrot 60.000 kroner til arbeid på den Trondhjemske postvei.

Stiftinga har to søknadsfristar, 15. februar og 15. september, og i 2012 prioriterer dei kunst og kultur, og nærmiljø, idrett og leik. Så her er det alle moglegheiter for lokale frivillige lag til å søka om støtte. Pengane kan ikkje gå til drift, løn, husleige eller liknande, og banken styrer også unna religion, politikk og næringsverksemd.

Meir info og søknadsskjema finn du på www.sparebankstiftelsen.no.

 

Breiddemidlar

Eit anna selskap som snart har søknadsfrist er kraftprodusenten BKK. Dei sponsar både storklubbar og Kirkens Bymisjon, men også mangfald og breidde innanfor idrett, kultur, og veldedige føremål, i selskapet sine eigar- og anleggskommunar. Dette siste omfattar både Nordhordland og Gulen, så før fristen 1. mars er det berre å finna fram til www.bkk.no og søka i veg.

Kraftselskapet gjev støtte til organisasjonar, lag og foreiningar som driv ulike kulturelle, humanitære og sportslige tiltak. Organisasjonen/laget/stiftinga må vera politisk og religiøst uavhengig, og ha ein ryddig økonomi. Støtte vert ikkje gjeve til enkeltpersonar.

For slike generelle sponsormidlar, som vert kalla «BKK Lokal», kan ein søka fire gonger i året: 1. mars, 1. juni, 1. september og 1. desember.

 

Kulturmidlar

Også kommunane er ein viktig bidragsytar til frivillig arbeid i idrettslag og velforeiningar, gjennom tidleingar av kulturmidlar.

I Lindås kommune vert det gjeve driftstilskott (søknadsfrist 1. mars), tilskot til drift/mindre investeringar i bygg/anlegg og til utstyr (søknadsfrist 1. mars), og aktivitets- og prosjekttilskot (søknadsfrist fortløpande og seinast 1. oktober). Kommunen har teke i bruk nettet til levering av søknadsskjema, dette finn du på www.lindas.kommune.no (søk på kulturmidlar når du er inne på sida).

 

Visjonære

Også Sparebanken Vest har ein pengepott som dei ønskjer å dela med lokalsamfunna rundt om. Ordninga heiter Visjon Vest, og der vert det formidla pengar til samfunns- og næringsutvikling, mellom anna til tiltak innan oppvekst og barn/unge.

Søknadsfristen for hovudtildelinga er 1. april, og meir info og søknadsskjema finn du på www.spv.no.

Bildet over viser nokre av dei som fekk pengestøtte i 2010. Frå venstre: Kinosjef for Nyheim Kino Arnljot Bjørge og leiaren i Kløvheim Ungdomslag, Anne Marie Fanebust (t.v.), var godt nøgde med pengegåva dei fekk av DNB i 2010, her overrekt av Tone Langeland, DNB-banksjef i Knarvik.