Poesi i blæst

– Veret kan me ikkje gjera noko med, men me har bestemt å flytta alle arrangement innandørs, fortel Linda Fosse etter at ho har avslutta framsyninga «Vi skal ikkje sova bort sumarnatta» laurdag.

Dette er ei framsynig om livet og diktinga til Aslaug Låstad Lygra som Linda Fosse sjølv har laga. Poesifestivalen er ei hundreårsmarkering for Låstad Lygre. Ho vart fødd på Lindås i 1910, men døydde av kreft alt i 1966.

Framsyninga vart godt besøkt, og mange kom for å takka Linda Fosse for framsyninga etterpå. Ei av dei var Låstad Lygra si eiga niese som hadde teke turen frå Austlandet for å oppleva festivalen.

Festivalen held fram med konsert med Herborg Kråkevik og fleire i sirkusteltet i kveld, laurdag. Der vil ei anna niese av Låstad Lygre medverka, og Linda Fosse skal og vera med der.

Søndag kan ein på nytt oppleva Linda Fosse si framsyning. Der vert barneteater, og Haldis Reigstad skal lesa eigne dikt. Der vert også program om diktarane Halldis Moren Vesaas og Olav H. Hauge. Pianisten Frode Skag Storheim frå Radøy har stikk-innom-konsert. Og motorsagkunstnarane held fram. Matservering er der i fleire telt, så folk treng ikkje ha med niste.

Det heile vert avslutta med konsert med Odd Børretzen og Lisa Strindberg i morgon ettermiddag.