Suveren siger til Assefa

– Det var ei tyngre løype enn i fjor, og det er vanskeleg å få god tid når du spring åleine, så eg er fornøgd med resultatet, sa Girma Assefa til Strilen etter at han hadde gått i mål på halvmaraton i suveren stil.

Tida vart 1.04.58, som er akkurat eitt og eit halvt minutt svakare enn i fjor. Men då var konkurransen i toppen mykje hardare.

Assefa har også vore skada, og det var litt tungt på springa i motvind, så han var nøgd med tida. Persen hans ligg på 1.01.

Betre enn i fjor

Bjarte Eikanger, som spring for Viking i Bergen, kom på ein nesten like klar andreplass, men over ni minutt bak vinnaren. Tida hans vart 1.14.02. For Eikanger var det ei klar forbetring frå i fjor, då han vart nummer ti på tida 1,17.42.

Tredjeplassen gjekk til Alamyehu Sitotaw på tida 1.16.27. Han vart nummer åtte i fjor, men tida då var vel eit minutt betre.

Frå Førde

Audhild Hestad, som er busett i Førde, men spring for Gaular, gjekk til topps i kvinneklassa på tida 1.25.28. Ho fortel til Strilen at ho har delteke i Knarvikmila før, men ikkje i halvmaraton. Det er den distansen ho likar best, og ho tykte løypa var fin. Men det vart litt tungt å springa over Haglsundbrua, sidan der var både motbakke og motvind.

Gro Svendal frå BFG Fana vart nummer to og Nancy Sommer nummer tre. Ho vart nummer fem i fjor.

226 deltakarar fullførde halvmaraton i år, om lag det same som i fjor.

Strilen kjem tilbake med fullstendige resultatlister i tysdagsavisa.