Vindkraft fram att på Sandøy

Det kan verta aktuelt å byggja vindmøller på strekninga Skipavik, Midtbøfjellet og mot Randal. Det er klart etter at Statkraft Agder Energi Vind DA (SAE Vind) har henta fram att planane om å byggja vindmøller på Sandøy.
Hydro hadde tilsvarande planar for ein del år sidan, men dei la planane bort fordi vindmålingar konkluderte med for lite vind.
– Me kjenner til desse målingane, men teknologien har utvikla seg sidan den gongen, og me finn området interessant, seier prosjektleiar Glenn O. Austegard.

Grunneigarmøte
For eit par veker sidan hadde selskapet møte med aktuelle grunneigarar. Møtet var i grendehuset på Sande, og mellom 15 og 20 grunneigarar møtte.
– Som vanleg var det delte meiningar, men fleirtalet av grunneigarane var positive, seier Austegard.
Ein vil no går vidare med kontakten med alle, og ein vil også ha ei synfaring i området seinare denne månaden.

Målingar
Austegard seier at prosjektet er i ein tidleg fase, og det inneber at det er vanskeleg å seia kor mange vindmøller det kan vera snakk om. Men ei utbygging er aktuell heilt frå Skipavik og nordover mot Randal. Ei synfaring skal mellom annan avklara kor yttergrensene for vindparken bør setjast.
Viss konklusjonen er at ei utbygging er aktuell, vil SAE Vind setja opp ei ny målemast for å få nye data på vinden.

Rutledal og
SAE Vind har også undersøkt mogelegheitene for vindmøller i Sløvåg, men har konkludert med at der er for lite vind. Men dei har også eit område aust for fylkesvegen i Rutledal til vurdering.
– Der har me også hatt møte med grunneigarane, og meiningane var delte, seier Austegard.
SAE Vind jobbar også med planar om utbygginga på Brosviksåta. Her arbeider ein no med utforminga av konsekvensutgreiinga.
– Som det leiande selskapet på vindparkar på land har me stor erfaring med vindkraft, og difor ser me Gulen som eit interessant område for utbygging, seier Austegard.
Sogn og Fjordane skal laga ein fylkesplan for vindkraftutbygging. Den vert truleg vedteken til hausten. Før den er på plass, har Noregs vassdrags- og energidirektorat (NVE) stansa sakshandsaminga av nye søknader i fylket.