Får film-hus på heimebødn

– Me vart ganske overraska då me fekk spørsmål om me kunne tenkja oss å låna vekk grunn til eit filmteam, men me stiller oss positive til det. Det er flott at nokon vil spela inn film i Meland, seier Bjarte Skintveit på Steinberget gård.

På eit jorde på garden skal det byggjast eit mellombels hus. Byg­get på 9 x 9 meter vert ei hovudkulisse i spelefilmen «Teresa og hennes åtte minutter eldre bror».

Bak filmen står produksjonsselskapet Paradox AS og Ape og Bjørn AS. Filmen er skriven og skal regisserast av Geir Henning Hopland frå Austrheim. Innspelinga skal etter planen skje i august og september. Då kan Skintveit og familien rekna med utsyn til eit yrande liv, med ein stab på 20 personar som skal stå for innspeling og opptak.

Vil svara kjapt
– Me vart spurde om  dette tidleg i vinter, og det har vore veldig kjekke folk å ha med å gjera. Me låner berre vekk litt av eigedom­men vår og skal ikkje ha nokon ting med filmen å gjera, men det er jo litt artig å få eit heilt filmteam inn i tunet, seier Skintveit.

Meland si avdeling for tekniske tenester fekk søknaden om film-huset tidlegare førre veke. Huset skal stå på nedsida av Fv 564, femten-tjue meter frå vegen.

Det tek til å hasta med å få huset på plass, så Meland kommune vert bedne om svar så raskt som råd. Og raskt svar vert lova: Bygget er under godkjenning og løyve vert skrive ut ein av dei første dagane, får Strilen opplyset torsdag.

Barndomsheim
Heile handlinga og innspelinga av filmen skjer i Nordhordland. Filmen er støtta frå Norsk filminstitutt og nasjonal kinopremi­ere er planlagt hausten 2013.

Om lag halve filmen føregår i og rundt huset på Steinberget, som framstår som barndomsheimen til hovudrolleinnehavar­ane Teresa og broren.

I løpet av filmen vil huset ta mykje skade. Difor må det byggjast slik at det er tilpassa handlinga.

Huset kjem der det i dag er grasmark. Der skal det først leggjast ut bioduk med pukk oppå. Rett på pukken vert det bygd eit hus i tømmer, så enkelt som råd og utan isolasjon, vatn/kloakk og elektrisk opplegg.

Nedste delen av tømmerhuset vert kledd med asfaltplater som seinare skal behandlast slik at det framstår som ein grunnmur. Rundt huset vert det gjort gartnararbeid, slik at det ser ut som ein truverdig og ekte hage.

Huset skal byggjast av Torleiv Nilsen entreprenør AS, med Magnus Stikholmen som prosjektleiar, heiter det i søknaden til kommunen.