Fedje feira med Elisabeth og Alexander

Svaret frå sjuåringen kom etter at Elise og 400 andre gav ståande applaus for Elisabeth «Bettan» Andreas­sen og Alexander Rybak sin konsert.

Saman med sine dyktige musikarar gjekk artistane ein runde i den fullsette fleirbrukshallen.
Og frå scena hadde Elisabeth gitt klar attest til Fedje-folket, som fylte dei fleste seta:

– Fy søren som de har kjempa for å få opp vraket av ubåten.

Det var akkurat det konserten skulle vera ei feiring av. Og ­aksjonskvinnene skulle gjerne ha overlevert blomster til dei to frontfigurane rett etter konserten. Avrundinga av konserten vart for hektisk til det, men­ ­blomane fekk aktørane seinare på kvelden.

Høgdepunkt i kø
Elise og alle dei 400 andre som fylte hallen på Fedje fekk verkeleg ein flott konsert. Her kom Elisabeth Andreassen sine melodiøse songar, blant anna av Rolf Løvland, på rekkje og rad, med proff musikk frå både band og Alexander Rybak si fele.

Og salen fekk sjølvsagt vera med på «La det swinge», låten som Elisabeth saman med Hanne Krogh vann den internasjonale finalen  i Melodi Grand Prix med i 1985. «Bobbysocks» var gruppenamnet då.

God kjemi
Konserten på Fedje var ikkje den første dei to Grand Prix-artistane heldt saman. Etter 10-11 konsertar fekk publikum oppleva eit band og framfor alt to solistar som var svært godt samstemte.

Alle kunne sjå og høyra at dei to har god kjemi og står godt til kvarandre. Alexander Rybak framførte også nokre strofer på svensk til ære for Elisabeth med Andreasson som jentenamn.

Eit lydhøyrt publikum var med frå første tone og strofe ­etter at ordførar Kristin Handeland hadde ønskt vel­komen. Frå første benk var ho blant dei som kunne klappa og kosa seg, saman med fylkesmann Svein Alsaker og blant anna ordførarane Jon Askeland, Astrid Aarhus Byrknes og Ole Lysø.

I bakgrunnen kunne Morten Øien og mange andre som har gjort dugnad konstatera at alt det tekniske fungerte som det skulle.

På slutten kom naturleg nok også «Fairytale», songen som både Fedje-folk og mange andre håpar at Alexander Rybak skal vinna med i Moskva i mai. Dei som var på konserten, er nok ekstra gira på at det norske håpet skal gå heilt til topps.