Heidra ein pådrivar

– Eg har fått samarbeida med Magne, og han har eit fantastisk engasjement som me treng.

Det sa ordførar Astrid Aarhus Byrknes då ho delte ut prisen i den tradisjonelle pausen i kommunestyret sitt budsjettmøte torsdag. I grunngjevinga vert Legernes si rolle som pådrivar framheva.

Då han i 2009 vart dagleg leiar i Nordhordland Ballklubb, uttalte han dette til Strilen: «Det er ikkje alle som får høve til å ha hobbyen sin som jobb. Eg er privilegert som får bruka meir tid på å halda folk i aktivitet. Er det noko eg står for, så er det at folk skal bevega seg og halda seg i form».

Dei orda reflekterer i stor grad prisvinnaren si innstilling, påpeika ordføraren. Ho omtalte Magne Legernes som ein bakspelar for å hjelpa andre og ein frontfigur for å få gjennomslag for det han brenn for.

Legernes har i mange år vore leiar i Idrettslaget Alvidra, og ei eldsjel i Alversunddagane, samt initiativtakar og turleiar for Barnas Turlag i denne delen av regionen. Saman med andre var han og ein pådrivar for kunstgrasbana i Alversund. Han har og fått tid til å vera MOT-informatør, med i styret for Frivilligsentralen og har sunge i Alversund Kammerkor, der han no har permisjon.

Som idrettsutøvar er han framleis ein aktiv fotballspelar på oldboysnivå.

– Me treng folk som brenn for noko og vil noko med nær­mil­jøet sitt, som vil skapa trivsel og som bryr seg om andre, sa ordføraren, som og retta ei takk og overleverte blomar til kona Ann Kristin Legernes.

– Tusen takk for prisen og gode ord og at de set pris på meg. Eg er heldig som får vera MOT-informatør. Og eg er privilegert som fekk veksa opp i ein familie der det var lov å ha draumar. Det eg har vore med på kunne eg ikkje fått tid til utan støtte frå kona og familien, sa Magne Legernes etter å ha motteke prisen, som er ein diplom og sjekk på 5000 kroner.

Legernes framheva og at Alversund er ei bygd der det er lov å ha draumar og jobba for å skapa eit godt miljø.