Intenst stykke – intens øving

No går Manger Musikk­­lag og andre brassband i heile landet inn i ei intens øvingsveke fram mot noregsmeisterskapen til helga. Søn­dag inviterte musikklaget til før-nm-konsert i Radøyhallen, og viste at dei er på god veg mot det som kan verta gode resultat. I alle fall hausta Manger Musikk­lag og dirigent Peter Szilvay ståande applaus på heimebane etter konserten.

Ei reise
Konserten vart opna av vertane, med det som er pliktnummer i årets NM, nemleg «Sketches from Nowhere» av Thomas Doss. Stykket skildrar ei reise frå ingenting, og slik høyrdest det også ut då Manger Musikklag framførte det.

Dei tok publikum med gjennom ei interessant opning og vidare inn i det som høyrdest ut som ei reise i verdsrommet, mot fantastiske nye planetar og kaos mot svarte hol. Musikklaget formidla godt og intenst. Men pliktnummeret er ikkje det einaste som skal sitja til helga.

I elitedivisjonen spelar ein to konsertar i NM, og konsert nummer to er eit sjølvvald stykke. «...Dove Descending» av Philip Wilby er Manger sitt sjølvvalte stykke i år. Det framfører dei i Grieghallen laurdag ettermiddag.

Fleire lokale
I Radøyhallen søndag var fleire korps med for å gje publikum smakebitar på NM.

Radøy Brass kom på scena etter Manger Musikklag og framførte «Coventry Variations» av Bramwell Tovey. Radøy stiller i andredivisjon i NM i år, med dirigent Tormod Flaten. Med på konserten var også Haukås Musikklag, samt Manger Old Star Brass, som skal spela i tredjedivisjon i NM. Sistnemnde skal spela «Salute to Youth» av Gilbert Vinter.

Meir elite
Strilelandet er også brass-land, og når NM går av stabelen til helga, er mange lokale korps med, som vanleg. Og også dei spelar konsertar i forkant. ­

Elitekorpset Eikanger-Bjørsvik musikklag spelte før-NM-konsert i Logen måndag kveld. Dei framfører stykket «Titan's Progress» av Hermann Pallhuber som sjølvvald stykke. Det er Dr. Nicholas Childs som dirigerer EBML.

Konsert onsdag
I morgon, onsdag, kan ein høyra om NM-formen er på plass hjå fleire lokale korps. Då inviterer Oster Brass til konsert i Knarren i Knarvik. Oster spelar i andredivisjon i år. Med seg på konserten har dei også Lindås Brass, som stiller i tredjedivisjon. Der finn me også Bjørsvik brass. I open klasse, ny ordning av året, finn me Knarvik Foreldrekorps og Seim Musikklag.