Juleball med A-Lee

– I år har me førebudd ballet ved å dela elevrådsstyret inn i grupper med forskjellige arbeidsoppgåver. Me har bestilt pizza, kjøpt inn brus og pynt, booka artist, reservert hallen, og ordna med alt anna som må være i stand, seier elevrådsrepresentant Charlotte Skjellanger til Strilen.

Å arrangera juleball på ein skule med rundt tusen elevar, er ikkje ein jobb gjort på ein, to tre. Det har elevrådsstyret fått erfara på fleire måtar.

– Det har blitt mykje fråver for elevrådet på grunn av planlegging av juleballet, men lærarane respekterer dette og godtar at me treng litt tid for å planlegga ballet. Det er jo blant anna det elevrådet er til for, og eg trur heile skulen set pris på at me ein rektor og lærarar som let oss få arrangere eit så stort juleball, seier Skjellanger.

Rundt 700 elevar kjøpte billett til ballet der dei kunne kosa seg med så mykje gratis pizza dei orka, brus, musikk og dans.

– Ein flott kveld
Sjølv om det var ungdommane som sjølv planla juleballet, stilte dei vaksne opp for å hjelpe til og for å syta for at det vart ein fin rusfri kveld.

–  Med hjelp av dyktige lærarar og rektor, Røde kors, politi, Lions og frivillige ungdommar som har stått vakt under ballet har kvelden gått knirkefritt. Det såg ut som om alle storkoste seg, og eg syns ballet har vore ein kjempe stor suksess, seier Skjellanger.

– Når me ser kor kjekt ungdommen har det er det berre en fornøyelse å stille opp som vaktar. Det er kanskje enkelte som øydelegg litt, men det må ein berre sjå litt igjennom fingrane på,  seier Alf Bjarne Nilsen frå Lions til Strilen.

– Eg synest elles at arrangementet er fantastisk ordna, dette med at ein kan eta så mykje pizza ein vil og få brus er kjempe flott, legg Nilsen til.
Nilsen kan fortelja at eit av Lions sine mål er å stilla opp for unge og eldre som treng støtte eller hjelp.

– Me har mottoet «Serve first» ein skal gi noko av seg sjølv og det er det me prøver på. På julemøtet vårt på onsdag bestemte me oss for å gje tjue tusen til ungdomskontakten Salto. Me syns det er kjempefint at ungdom har ein  opphaldsstad med tilknyting til vaksne som dei kan stole på og som høyrer på dei, seier Alf Bjarne Nilsen.

DJ og live opptreden
Under ballet dansa elevane til god musikk frå DJ, men klokka elleve kom høgdepunktet på scena.

– A-Lee og Kløver Knekt var knallflinke og elevrådsstyret er veldig nøgde med at me valte desse artistane til å opptre på juleballet, seier Charlotte Skjellanger.

Og mange storma ut på dansegolvet for å ta imot A-Lee med stor applaus, og det var brukt for heile fem vaktar ved scena.

– Eg var ein av dei som stod med scena under A-Lee sin opptreden, eg kjente trøkket frå høgtalarane i kroppen og levde meg inn i det, men som vakt kan me ikkje sleppa oss heil laus, seier Alf Bjarne Nilsen.

– Det er fantastisk å opptre for eit slikt entusiastisk crowd, seier A-lee og resten av gruppa til Strilen.