Kjendisar i kø til Lygra

– Eg har sjølv jobba med dette i eit år og vel så det! seier Linda Fosse om det omfattande programmet som no er klart for «Sumarnatta på Lygra» helga 20.-22. august.

–Programmet bør interessera alle, håpar Fosse. Festi­valen på Lygra vert den første lokale jubileumsmarkeringa av at det i år er 100 år sidan Lindås si eigen Aslaug Låstad Lygre vart fødd.

Utover hausten held Lindås kommune fram med fleire andre markeringar av jubileet.

Tett program
Av lokale krefter på festivalen kan nemnast Linda Fosse sjølv, som vil ta publikum med på ei reise i Låstad Lygre sitt liv og dikting. Det skjer på laurdag.

Alt fredag dreg Jon Hjørnevik og Dagfinn Iversen i gang festivalen, der kvelden vert avslutta med show og dans av Strilabandet.

Etter konsert med Herborg Kråkevik laurdag kveld, vil fem kjende lokale spelemenn by opp til dans.

Søndag vert det og eit omfattande program, som Odd Børretzen & Lisa Strindberg avsluttar med konsert om kvelden.

Annakvart år?
I tillegg til det store programmet med poesi, musikk og dans, har arrangørane fått tak i motorsag-artistane Rick og Randi Boni frå USA.

– Det er heilt utruleg kva dei kan få til av treskulpturar med motorsag! seier Fosse.

I tillegg vert det ei utstilling med tekstilhandverk frå fleire land, bokbussen vil delta og det vert salsboder og andre utstillingar rundt om på Lyng­heisenteret.

– Dette vert ein festival som heile familien kan delta på. Me har førebels sikra oss støtte frå kommunen, fylkeskommunen og nokre større firma. Elles vil publikum avgjera om det vert fleire slike festivalar. Vert det suksess, tenkjer me på å prøva annakvart år. Lyngheisenteret er ein fantastisk plass for ein slik festival, seier Linda Fosse.