Kom med vakker song til Leonard

– Eg er veldig glad i song. Mor mi var pinseven, og me var ofte med på møte og høyrde alle songane, fortel Leonard Alfred Soltvedt på Sletta til Strilen.

Han var den første som fekk besøk av Solveig (16) og Mari Karoline (17).

Som eit ledd i kulturdagane på Radøy var dei med på turen rundt med middag til heimebuande eldre, og på kjøpet fekk dei eldre denne dagen vakker song og gitarspel av to blide jenter.

Tørka tårer
– Dette var veldig kjekt. Det kjekkaste eg veit, er jenter, sa Leonard, etter at jentene hadde sunge Hellbillies-låten «Det kjæraste eg veit» for han.

Leonard vart så rørt over besøket og songen at han måtte tørka nokre tårer. Han kunne elles fortelja at i ungdommen hadde han vore FN-soldat i Gaza og sett fæle ting.

– Takk for besøket og kom gjerne igjen, sa han då dei drog.

Kjekt å vera med
Det er ungdomskoordinator Katarina Birkeland som fekk ideen til at unge skulle reisa rundt og underhalda for dei eldre i samband med kulturdagane. Etter planen skulle fleire unge vera med, men litt sjukdom og anna gjorde at Solveig og Mari Karoline vert dei einaste denne gongen.

– Me sa ja med ein gong me fekk spørsmålet. Det verka så kjekt å kunna koma rundt til dei eldre, seier dei to.

Trass sin unge alder har dei i fleire år arrangert julekonsert i Emigrantkyrkja på Sletta, der dei begge bur.

Kjende bestefaren
Den neste som fekk besøk, var Vemund Gunnarson på Soltveit. Også han var glad for å få besøk, og då han høyrde kva dei heitte, visste han godt kven familien deira var.

– Eg hugsar godt bestefar din. Han spela trekkspel i bryllaup og liknande. Betalinga var 15 kroner, sa Gunnarson til Mari Karoline. Og han kunne hugsa at mor til Solveig var flink å syngja då ho var lita.

Jentene var med på heile runden som Kåre Færøy køyrde med middagar denne dagen. Færøy er sjølv pensjonist, men tredjekvar helg køyrer han ut middag til heimebuande eldre på Radøy på oppdrag frå Frivilligsentralen.