Manger får spela i operaen

Hypermusikalen om Manger Musikklag fekk gode kritikkar i Bergen. No står hovudstaden for tur. 21. mai neste år går korpset på scena i Den norske opera i Oslo.
 
– Heilt spesielt
– Det er veldig spesielt. Det er ikkje kvardagskost at brassband får innpass i operaen. Denne musikalen handlar jo om livet i Manger Musikklag, så det vert svært personleg for oss, seier formann i MML, Nils-Arne Træland.
Det er mannen bak musikalen, Glenn Erik Haugland, som får æra for at Manger-musikantane får spela i operaen.
– Han har mange gode kontaktar og har trekt i dei riktige trådane. Me har også ein del andre tilhengjarar som har stått på for å få dette til. Det betyr veldig mykje for oss, seier Træland.
 
Skildrar korpslivet
I hypermusikalen får publikum eit innsyn i det indre liv i elitekorpset frå Manger. Tekstane skildrar mellom anna ei altoppslukande musikkinteresse, musikkglede og samhald. Åtte jentestemmer formidlar også musikantane sine tankar i ulike situasjonar. Tankane som vert presenterte, er basert på intervju med musikantar.
– Musikalen er skriven spesielt for oss og me har fått veldig mange positive tilbakemeldingar på han. Det har vore jobba ei stund for å få musikalen til Oslo, men eg trur framleis ikkje at det har gått opp for oss at dette no har lukkast. Det er litt uverkeleg. Nyheita er så fersk at me ikkje har fått tid til å diskutera det oss imellom enno, seier Træland.
 
Rett frå EM
Musikalen skal visast på scene 2.
– Ho er mindre enn hovudscena, men for oss er dette veldig stort og spesielt for dei yngste i korpset. Sjølv har eg aldri sett operaen. Det vert stas å koma dit for første gong og ikkje berre rusla på taket, men også få oppleva Manger på scena, seier han.
Kor stort publikum korpset kan forventa å få, tør ikkje Træland gjetta på.
– Her heime har me tilhengjarar som kjem for å høyra oss, men det vil nok verta litt annleis på Austlandet. Det er på Vestlandet ein finn det største brassmiljøet. No gler me oss til å dela bodskapen vår med eit nytt publikum.
2011 vert i det heile tatt eit stort år for Manger Musikklag.
– Dette vert eit år med mange store hendingar for oss. Først skal me til EM og så kjem dette berre nokre få veker etterpå. Me får ein travel vår, og me gler oss, seier Træland.