Med i draumekorps

Kven ville du hatt med deg visst du kunne velja og vraka mellom verdast beste brasspelarar? det er spørsmålet når nettstaden 4barsrest.com sett saman The 4BR Band of The Year. Nettstaden er godt kjent blant brassfolket og set kvart år opp ei liste over spelarar som dei meiner har utmerka seg og prestert på sitt aller beste i året som har gått.

Mange lokale namn
I Nordhordland likar me å skryta av at me har to av verdast beste brassband, og når 4barsrest set opp sitt draumekorps for 2011, finn ein mange lokale namn der. For å leia draumekorpset sitt har nettstaden plukka ut David King som leier Brighouse & Rastric og Peter Sebastian Szilvay som er Manger Musikklag sin sjefsdirigent. King leidde også Eikanger-Bjørsvik til siger i fjorårets NM.

På ­kornett meiner dei at Erlend ­Aagaard Nilsen i Manger Musikk­­lag har utmerka seg i så stor grad at det kvalifiserer til å få spela første solokornett. Dei meiner at han utmerka seg  både i NM, SIDDIS og spesielt i EM. «A class act all season», heiter det i grunngjevinga for det. Også Henning Anunsen frå Eikanger Bjørsvik er med på favorittlista over solokornettistar.

Grunnlag for store prestasjonar
Lokale namn finn ein også i tromboneseksjonen. Der vert både Birgitte Bjørnsdatter Bruget og Camilla Søderstrøm Tveit trekt fram. Dei speler begge i Manger musikklag. Om Birgitte vert det sagt at ho langsomt men sikkert har vorte ein av Europas leiande trombonistar. «In 2011 she was the complete deal on a worldwide stage- and showcasted her qualities to brilliant effect.»

Om Camilla vert det sagt at ho nok ein gong er den beste, og at det er «Hard to think of a player who can bring such dark sensu­ousness to their playing, whilst also having the skill set to diliver it with pin point delicacy too.»

For andre år på rad vil nettstaden også ha med Erlend Gjersvoll Brandsøy og Fredrik Berentsen i Eikanger-Bjørsvik på Bb-bass. Det vert sagt at ingen andre band har Bb-tubaistar som dei, og at dei gjev korpset sitt eit grunnlag som dei kan byggja store prestasjonar på.

– Veldig overraskande
Birgitte Bjørnsdatter Bruget er både overraska og glad for at hennar namn er med på lista.

– Det er veldig kjekt å bli lagt merke til. Det er så utruleg mange dyktige folk der ute og eg er audmjuk med tanke på alle som like godt som meg kunne fått namnet sitt på denne lista, seier ho.
Bruget kan sjå tilbake på eit år med mange hendingar.

– Både NM og EM var store opplevingar. Det er særleg britane som har dominert eliten i brassbandverda, men dei siste åra har også norske korps fått meir og meir merksemd og då særleg Eikanger og Manger. Det er gledeleg og eg håpar det er ein trend me får sjå meir av, seier ho i ein kommentar til Strilen.

Bruget fortel at det er stort at så mange namn frå dei lokale korpsa har hamna på årets liste.

– Det lovar bra for framtida, seier ho.

Oversikt over kven som er kome med på lista «The band of the year 2011» finn du på nettsida 4barsrest.com under kategorien «articles».