Myking-elevar best på avis

– Bror min var med og vann ­premie for nokre år sidan, og me veit om fleire her som har vunne, så me hadde veldig lyst å gjera det same, seier Anna Lena Nævdal. Ho er ein av sju elevar i sjuandeklasse på Myking skule.

Ei veke med avis
Mange lokale skular har vore med på Avis i skolen sitt «Vis med avis»-prosjekt. I ei veke har elevar fått levert Strilen på skulen til bruk i undervisninga. Prosjektet vart avslutta med ein konkurranse der elevane fekk utlevert ein test med tjue spørsmål, og no er vinnaren kåra. På Myking var stemninga spent før avsløringa.

– Læraren vår sa at det skulle skje noko spesielt i dag, men ho ville ikkje seia kva det var. Me tenkte at det kanskje hadde noko med konkurransen å gjera, så me brukte friminuttet til å halda utkikk over skuleporten, seier to av jentene i klassen.

Dei synest det er stas at klassen stakk av med førstepremien på 1500 kroner, som dei kan bruka til noko kjekt.

Laga veggavis
Myking-elevane kan visa fram flotte veggaviser som heile klassen har laga med oppslag henta frå avisene. Men det er også vorte tid til litt kos.

– Teikneseriane, «norom brunæ» og bursdagshelsingane er kjekke å lesa, seier sjuandeklassingane, som synest det var stas å få lesa Pondus-striper i skuletida.

Elevane har også forklaringa klar når journalisten spør om kva som er løyndommen bak suksessen.
– Me har kjempeflinke lærarar og så jobbar me hardt fordi me har lyst å vinna, seier dei.

Kanskje kino eller lesevake
Elevane på Myking skule hadde eit gjennomsnitt på 17,6 poeng etter å ha svart på 20 spørsmål. Og dei reknar ikkje med at det vert noko problem å bruka opp pengepremien. Klassen var nyleg på tur til Vannkanten i Bergen for å bada, og det gav meirsmak.

– Me kan gjerne gjera det ein gong til, eller kanskje heile klassen kan gå på kino, eller me kan bruka pengane til noko kjekt. Me har lyst til å ha lesevake, seier elevane, som vann med knappe to poeng framfor ein annan lokal skule.

Så gjenstår det å sjå om nokon tek utfordringa og prøver å slå Myking skule neste år.