På hovudet i dansen

– Det var av og til litt vanskelig å dansa og halda rytmen. Det er gøyare med berre turn, men han dansaren var veldig flink, og det var jo veldig gøy, held Cornelia fram.

Ho fekk mellom anna prøva seg på å gå på hendene og å sparka hatten av ein stokk. No har ho prøvd seg på hallingdans.

Engasjert mor
Radøy idrettslag er arrangørane av hallingdanskurset på Sletta. I spissen står ei engasjert mor. Kjersti Flatråker er ikkje medlem i idrettslaget, men ho er veldig interessert i dans og ville gje borna i bygda ein liten smak på noko spennande som hallingdans.

Kjersti Flatråker var tidligare med i ei folkedansgruppe, og ho kjenner Martin Myhr etter dansestudiar i Trondheim. Arrangementet er ein del av kystsogevekene, og med veldig velvillig innsats frå idrettslaget fekk dei sett saman dette kurset.

– Me kjem til å følgja opp med eit dansekurs i haust. Då framleis med folkedans. Det vert ein litt roligare type, men litt halling skal me òg ha, kjem det frå Kjersti Flatråker.

Kjend dansar
Mannen som heldt kurset, er ein veldig dyktig dansar som heiter Martin Myhr. Han jobbar med folkedans som frilansar. Myhr reiser mykje rundt heile landet og jobbar med mellom anna kurs, danseforestillingar og teater.

Han har vore med i juleførestillinga Putti Plutti Pott kvart år i 22 år no. Han er kanskje mest kjend frå dansegruppa som dansa til ­Alexander Rybak i Melodi Grand Prix, Frikar. Myhr har òg vore mykje på folkehøgskulen på Manger som gjestelærar.

Hopp og sprett
Fleire av borna som kom på kurset går på turn, og ein av dei sprekaste var Preben Friis Thomasen (9). Leikande lett reiste han seg opp på hendene og gjekk bortover opp ned. Han hadde ikkje store problem med å halda følgje med Myhr.

– Det er litt trangt sidan me er så mange, men det er veldig gøy. Å halda rytmen er ikkje så vanskeleg, seier Preben.

– Det er viktig for oss at ungane får oppleva levande musikk, så me har med oss tre lokale spelemenn på fele. Det var òg viktig at me hadde ein proff dansar, seier Kjersti Flatråker.

Godt oppmøte
Det var mange som møtte opp på dansekurset. To timar var absolutt ikkje for lang tid, og både foreldre og born  koste seg. Kjersti Flatråker er nøgd med kvelden og har fått tilbakemeldingar om at folk vil dansa meir, og dei ser veldig gjerne at Martin Myhr kjem tilbake.