Riisnes går til filmen

Det er filmskapar Magne Helge Sleire som er i ferd med å laga fjernsynsfilm om Erik A. Riisnes.

– Han er ein av dei siste i ein utdøyande rase som tidlegare var talrik her i distriktet: fiskarbonden, seier Sleire til Strilen.

Erik A. Riisnes er bonde på Risnes i Masfjorden, der han driv både med mjølkeproduksjon og sau. Men i tillegg er han fiskar frå eigen sjark.

På land og sjø
Magne H. Sleire har følgt Erik A. Riisnes i arbeid både på garden og i fiskebåten, og arbeidet med filmen er enno ikkje avslutta. Mellom anna tek Sleire sikte på å vera med på sauesanking i haust.
Sleire har avtale med NRK, og den halvtime lange filmen vert send ein gong i løpet av våren neste år.

Krabbe
Erik A. Riisnes fiskar både etter dei vanlege fiskeslaga som finst i sjøen her, og etter krabbe. Han er også eit fast innslag på Torget i Bergen laurdagane, der han sel krabbefangsten. Der har også Sleire gjort opptak.

Riisnes har også vore engasjert i politikken i Masfjorden og vore ordførar.

– Han har meiningar om mangt, og det vil også koma fram i filmen, seier Sleire, som har søkt kraftfondet i Masfjorden om støtte for å laga filmen.