Sjøsette austfjordbåt

Ei salig duft av tjøre og treverk fyller vognhallen som har fungert som båtbyggjarverkstad sidan tidlig i haust. Kvinner, born og menn flokkar til for å beundra den 160 år gamle austfjordbåten som står her, og ikkje minst, kopien av denne, som Øyvind Hosøy har bestilt og skal overta i løpet av dagen. Dei må bort og kjenna på treet, dei følgjer linjene i skroget med tindrande auge og fleire stikk nasen mot det tjørebreia treet for å snusa inn dufta.

– Dette er barndomsminne for mange, seier Hosøy som kjem frå ein av dei store båtbyggjarfamiliane i Nordhordland. Det var oldefaren og tippoldefaren hans som bygde den originale kyrkjebåten.

Brukar berre augemål
Kopien er bygt av Hallgeir Forstrønen Bjørnevik og Bjørn Ådne Kvalvik på rundt 900 arbeidstimar. Dei er begge båtbyggjarar på fulltid, men ingen av dei hadde bygt ein austfjordbåt tidlegare. Ved hjelp av ein raud tråd og Arne Høyland sin kunnskap om trebåtar frå Nordhordland, har dei kopiert kvar minste detalj av originalen etter augemål.

Særprega utforming
– Spesielt dei nedste borda framme, kalla halsar, er veldig forma, meir enn kva dei er på oselvarar for eksempel. Dette gjer at båten skjer inn i og brettar ut krappe fjordbølgjer. På Os er tradisjonen at ein høgg til treet og bøyer det, medan i Nordhordland er treet mykje forma før det vert sett i båten, seier Kvalvik.

Hardingen bur på Fedje og har helgependla til Os for å byggja båten.

– Austfjordbåten har fire bordgonger, medan ein oselvar har tre. Dette skiljet i byggetradisjon går omtrent ved Bergen. Dei høge stamntoppane gjer båten ekstra staseleg og gjev han eit mektig preg.

Byggjer for generasjonar
– Det å formidla denne båtbyggjarkompetansen gjennom nøyaktig kopiering, er meir berekraftig enn å vøla på gamle, skjøre damer som originalane gjerne her, seier Hosøy, men no er det ikkje tid for meir snakk.

Båten skal nemleg berast gjennom Os sentrum før sjøsettinga. Dei bukserer båten så vidt ut av vognskjulet før dei finn ut at det vart litt tungt, og nokon finn fram ei vogn slik at dei kan trilla båten i staden. Hosøy styrer i front, så kjem båten og årane med stort og smått av folk. Vel framme ved Oselvarverkstaden, får barnebarnet til eigaren, Tina Nordås (10) æra av å døypa båten og ønskja hell og lukke. Familien er òg dei første som får prøva båten på fjorden.

Oppkalla etter storebror
Medan folk prøvde båten etter tur, var det kaffi og noko attåt i «kongelosjen», naustet i Oselvarverkstaden.

– Båten har fått namnet «Steinar» som eit minne om eldste bror min, som var ei eldsjel på alt som minna han om gamledagar. Han var ein glad gut, ein av pådrivarane bak Torgdagane på 70- og 80-talet saman med Johannes Kleppevik og andre. Han likna Marlon Brando, med eit lurt blikk for dei verkelege damene der han sat i den skjøre originalen og prøvde å ro, prata, glo og ausa samtidig, sa Øyvind Hosøy i dåpstalen.

Og kva skal båten brukast til?
– Den skal eg bruka til å hjernevaska barneborna med sjøvatn, seier Hosøy.