Skjemtegauken Vidar

Publikum lo så godt av Vidar Hodnekvam frå Knarvik sine sprell på scena under humorfestivalen Skjemtegauk, at dei kåra strilen til beste innslag.

Dermed har den svært morosame 27-åringen gjort seg fortent til tittelen «Årets Skjemtegauk» to år på rad, som første dobbeltvinnar i festivalen si sju år lange historie.

Humorfestivalen fann stad i Ulsteinvik på Sunnmøre i helga.

 
Lever av latter
Vidar Hodnekvam (27) frå Knarvik debuterte som ståopp-komikar i 2007.

Sidan har han vore ei sentral brikke i Stand Up Bergen, som arrangerer ståopp-show kvar veke i Visekjellaren på Ricks.

Hausten 2008 prøvde han seg også som skodespelar, då han spelte rolla som teikneseriefiguren Rocky.

Han har fått folk til å le på klubbscener i heile landet, og kan leva av å gje folk latterkrampe.

 
Kjende og kjærast
Hodnekvam hadde tøff konkurranse om å trimma publikum sine lattermusklar under humorfestivalen i helga.

– Kåringa har aldri vore jamnare enn det ho var i år, og få stemmer delte dei øvste i årets konkurranse, opplyser festivalleiar Åge André Breivik.

Hodnekvam kniva om komiprisen mot mellom anna kjende Janne Rønningen, tidlegare vinnarar Tore Haukanes og Christer Torjussen, og sin eigen kjærast Ellinor Christiansen. Ho vart kåra til årets nykomar på ståopp-scena på Humorfestivalen i Stavanger i 2008.

Dessutan var det også med ein annan kar frå Lindås, Ole Soo. Han har som Vidar også bakgrunn på Stand Up Bergen.

Sjå dei sjølve
Dersom du vil sjå klipp Vidar Hodnekvam og Ole Soo i aksjon, kan du mellom anna søka på www.youtube.com, eller sjå på Bergens Tidende sine nettsider under kategorien Tidig.

Der finn du klipp av dei morosame strilane, i selskap med kjende namn som Are Kalvø og Dagfinn Lyngbø.

Sommarshow
No i sommar er det også ståopp-show i Visekjellaren kvar fredag, med god sjanse for at nokre av dei morosame strilane brått står på scena.

Førstkommande fredag er Hodnekvam konferansier på Sommarstandup, medan han fredag 30. juli etter planen skal vera ein av fem komikarar på scena.

På bildet ser du Vidar Hodnekvam saman med konferansier Christer Torjussen. Foto: Åge André Breivik/Skjemtegauk