Stemningsfull debut

– Me sa i førevegen at om det dukka opp to personar var me nøgde. Så i dag er me kjempenøgde, smiler Monica Eide (29) frå Eikanger.

Saman med bandet sitt heldt ho minikonsert i Knarvik Senter fredag kveld. Dei mange som tok eit avbrekk i handleturen sin for å lytta til det lokale talentet fekk høyra både leiken, fantasifull og stemningsfull musikk, samstundes som dei kunne sikra seg debutalbumet Carousel og autograf frå artisten.

På heimebane
– Det er litt spesielt å kjenna annakvart fjes når ein står på scena, smiler ho når Strilen spør korleis ho synest det er å spela på heimebane.

Minikonserten var første konserten Eide har hatt i Nord­hordland etter at plata kom ut, og ho tykkjer det er stas å syngja for sambygdingane. 

– Ein vert litt ekstra nervøs når det er så mange eg kjenner, men det er veldig kjekt, fortel ho.

Eigen stil
Den talentfulle dama har spela musikk heile livet. Og gjennom platesatsinga dei siste to åra har ho jobba seg fram mot eit eige særpreg. 

– Musikken er ei blanding av både pop og jazz for å nemna noko. Eg har henta inspirasjon frå musikk eg likar sjølv, og ut i frå det laga musikk eg sjølv kunne tenkt meg å lytta til, fortel ho.
 
Lokalt band
Dei fleste medlemene i bandet hennar kjem frå Nordhordland.

– Bandet blei eigentleg til litt etterkvart som låtane vart til. Undervegs oppdaga eg til dømes at det hadde vore fint med cello ein plass, og koring ein annan plass, så då byrja eg å leita etter folk som kunne det, seier ho.

Og ho trong ikkje gå så langt. På kontrabass har ho lillebror Vegard, som også syng litt duett med systera. Og på slagverk har ho Sondre Veland frå Stranda. Den einaste ho har henta lenger vekke ifrå er Charlotte Asserson frå Bergen på cello, mandolin og som korist.

– Dei er kjempeflinke og inspirerande musikarar alle saman, legg ho til.

God respons
Medan Strilen snakkar med henne kjem det mange bort som ønskjer å kjøpa ei signert plate. Og dei gode orda let ikkje venta på seg.

– Ho er kjempeflink! Dette er musikk eg kan lika, seier Vigdis Namdal som fekk med seg konserten frå byrjinga til slutt, pluss signert plate.

– Veldig fint å høyra på! sa andre.

Monica ser ut til å trivast med å signera plater, og signeringa i senteret gav henne god øving i å skriva autograf.

– Eg skulle kanskje funne ein autograf som gjekk litt kjappare å skriva, smiler ho og legg til.

– Kanskje ein fin signatur der eg berre brukar M og E hadde vore noko, avsluttar ho.