Storslått «Messias» i Myking kyrkje

Messias av Georg Friedrich Händel
Myking kyrkje søndag 18. desember
• Sopran: Kjersti Wiik
• Alt: Tone Kvam Thorsen
• Tenor: Tore Kloster
• Bass: Magne Fremmerlid
• Alversund Kammerkor
• Kammerorkester, kapellmeister Gunvor Holtlien, trompetsolist Erlend Aagaard-Nilsen
• Dirigent: Odd Leif Mjøs

«Messias» av Georg Friedrich Händel er eit mektig verk som tek for seg mykje av bibelsoga, frå dei gammaltestamentlege profetiane om Messias, til Jesu fødsel, død og oppstode.

Tekstane er kraftfulle og dramatiske, til dels patosfylte i ei gammal språkdrakt frå King James Bible frå 1600-talet.

Händels musikk varierer med innhaldet i tekstane, frå det alvorstyngde og sorgfulle til det lystige og jublande, og det kom også godt fram i konserten på Myking.

Mektig bass
Av solistane imponerte kanskje bassen Magne Fremmerlid mest. Han har ei mektig stemme som nesten vart for stor for Myking-kyrkja. Det var lett å høyra at han er profesjonell operasongar som er van å syngja i store lokale. Fremmerlid fekk godt fram det dramatiske i teksten, og ikkje minst «For behold, darkness shall cover the earth» var mektig og gripande.

God Kjersti Wiik
Lindås eigen Kjersti Wiik var tilbake som sopransolist, og ho kom svært godt frå oppgåva. Ho song med innleving og kraft, og for denne meldaren var sluttsongen hennar, «I know my redeemer liveth», høgdepunktet.

Tenoren Tore Kloster var eit nytt bekjentskap, men han hadde ei god og kraftig stemme og fekk godt fram innhaldet i teksten.

Alten Tone Kvam Thorsen kom og greitt frå oppgåva, men mangla den varme klangen i stemma, og det er synd, for alten har nokre av dei vakraste solopartia i heile verket.

Godt kor
At Alversund kammerkor er flinke, visste me frå før, og dei meistra oppgåv svært godt. «Messias« er litt av ei kraftutfalding. Verket varer i over to timar, og koret er med mykje av tida. Og der er mange utfordrande parti, som lett kan falla frå kvarandre viss ikkje koret er presis og på hogget.

Igjen må me særleg rosa sopranane, som var kraftige og klare. Også dei andre stemmene klarte seg godt, men tenorane kunne gjort meir av seg.

Dyktig orkester
Orkester var samansett av innleigde musikarar frå Bergen Filharmoniske Orkester, pluss nokre lokale musikarar. Kapellmeister var Gunvor Holtlien, og orkesteret kom svært godt frå oppgåva, ikkje minst i den vakre Pastoralesymfonien.

Engasjert dirigent var Odd Leif Mjøs. Han var som ein ballettdansar framfor kor og orkester, stundom på ein fot, stundom bøygd framover eller bakover så ein var redd han skulle missa balansen.

Den flotte konserten hadde fortent fleire tilhøyrarar. Det var god plass i Myking kyrkje, som framstår vakrare enn nokon gong etter oppussinga.

UNG: Tore Kloster er ein ung tenor, som sist song saman med Alversund kammerkor i Juleoratoriet av Bach i 2008.

MEKTIG: Magne Fremmerlid imponerte med si mektige bassrøyst.

SOLIST: Erlend Aaagard-Nilsen var solist på trompet og kom svært godt frå oppgåva, mellom anna i »The trumpet shall sound». Bak Hogne Olai Holmås, som spela pauker. Hallgeir Øgaard spelte orgel.

Livar Aksnes