Tanita i X Factor

– Eg har ikkje lov å seia om eg kom med vidare, eller om eg rauk ut alt på audition. Det er ikkje offisielt før på fredag, seier den nitten år gamle syngedama på telefon frå Kypros. For alt me veit, kan ho ha gått heilt til topps i konkurransen og vore med å spelt inn alle dei 21 programma som no er ferdige.

– Å ikkje få lov til å fortelja om korleis det har gått til andre enn dei aller nærmaste familien, er grådig vanskeleg, så eg gler meg til sendingane kjem i gang så eg får ut litt av spenninga, seier ho.

Vil satsa på musikk
Heilt sidan ho var lita jente, har Tanita likt å syngja. Og mindre synging har det ikkje blitt med åra. Med bandet, «Tanita and the killerband», er Tanita rett som det er å sjå på scena her heime. Og no skal vert ho kanskje å sjå henne på tv-skjermen i tillegg.

– Det får me no nett sjå, ler ho lurt.

Sjølv om Tanita i februar tok sveinebrev som frisør, er det musikk ho vil satsa på framover. Frisøryrket kan ho ha i bakhand, meiner ho.

– Eg tenkte X Factor kunne vera ei fin moglegheit til å koma litt på veg, seier ho.

– Kor langt satsar du på å koma?
– Langt.

Nervepirrande audition
I mai var ho på auditon i Bergen, og det var forferdeleg nervepirrande, sjølv for Tanita som er van med å stå på scena. Men det hjelpte å ha med vener og familie, fortel ho.

– Det var lang venting og eg var veldig nervøs, spesielt for Jan Fredrik Karlsen, utan at eg veit heilt kvifor. Kanskje det rett og slett var fordi eg visste kven eg skulle syngja for, seier ho. Under audition song ho Amanda Marshall sin «Let it rain». Til den fekk ho lov å ha med seg playbackmusikk.

– Eg kunne spelt eit instrument sjølv i staden for, men eg hadde nok med synginga, ler ho.

– Kva skjer med musikkplanane dine om du ikkje kjem vidare i  X Factor?
– Eg vil satsa på musikk uansett. Trur ikkje det vert plate med det første, men eg har veldig lyst å satsa på det over litt tid, seier ho.

Fredag kveld klokka 19.30 sit Tanita garantert klistra til tv-skjermen.
– Eg har mest lyst å sitja heilt åleine i kjellaren heime der eg bur, men det vert vel ei samling oppe i stova, kan eg tenkja meg. 

– Korleis vert nervane den kvelden då, trur du?
– Ikkje fullt så gale som under audition, men sikkert ikkje langt ifrå, ler den unge og talentfulle songfuglen frå Seim.