Torsheim fylte Dalheim

– Showet de skal få sjå no har de aldri sett liknande til før, lova Birger Meland då han introduserte Oddvar Torsheim.
Og dei frammøtte fekk sjå Torsheim syngja og fortelja vitsar.

Fulle hus
Leiar for ungdomslaget Nybrot, Marit Trædal, fortel at arrangørane la ut 250 billettar på førehandssal. Alle vart selde.

– Det har vore ein del som har kome til oss med ønske om å få Torsheim til Hundvin, så me tok kontakt med han, og det passa med hans program, fortel Trædal.

Torsheim vart kjend over heile Noreg i fjor, då han var med i «Norske talenter», der han song Beatles-songar på nynorsk.
– Den der «Love me do» var vanskeleg å omsetta til nynorsk, men eg oversette den direkte til «lov meg det no», sa Torsheim, til stor latter i salen.

Godt nøgde
At dei frammøtte fekk valuta for inngangspengane, var det ingen tvil om. Innimellom songane sine slo Torsheim til med vitsar.

– Du veit, han der Michael Jackson kan aldri synga den der Vær glad for den nasa du har, for han har jo inga, sa Torsheim.
Etter dette gjekk det slag i slag med song og vitsar.

– Me har fått veldig gode tilbakemeldingar frå folk, og det verka som om alle var godt nøgde med kvelden, seier Trædal.
Kvelden starta kl 21.00 med Torsheim-showet, som varte litt over ein time.

Heldt ut
Då showet til Torsheim var over, signerte han plakatar av seg sjølv til dei som ville ha.

– Det var mange som nytta seg av sjansen til å skaffa seg ein plakat, fortel Trædal.
Og då han var ferdig med dette vart stolane rydda ut av storsalen, og det var klart for dans.

– Birger Meland spelte heilt til klokka to på natta, så han heldt ut lenge. Medan han spelte koste Torsheim seg ute på dansgolvet, og dei var der til det var slutt begge to, fortel Nybrot-leiar Marit Trædal.