Varme hjul og vågale stunt

På fredag såg dei på Hot Wheel Brothers-motorshowet som med mykje fart og spenning fann stad på Knarvik-kaien. Her fekk dei ei ekstra oppleving då brørne leita etter to jenter til å delta på eit stunt der bilen kjører på to hjul.

– Det var gøy! er jentene einige om.

Sjølv om dei blei slengt litt rundt omkring i baksetet på bilen, synest dei ikkje opplevinga var særleg skummel.

– Det var ikkje så skummelt, det var gøy, seier Lygre.

Jentene kan likevel fortelja at dei sjølvsagt merka kribling i magen.

Monstertruck og motorsykkel
Med monstertruck, motorsyklar, flammar, smell og dristige stunt gav Hot Wheel Brothers også ei oppleving til dei andre oppmøt­te. Kameratane Elias Brakstad (6) og Marius Jay Dom­mer­nes (7) var blant dei som var ekstra gira.

– Me elskar crossmotorsyklar! Eg skal byrja på cross etter sommaren, seier Elias Brakstad, som har fått ekstra entusiasme frå motorshowet og nesten ikkje kan stå stille i pausen. Det er altfor mange motor­syklar å sjå på!

Det var ikkje berre cross-syklane som fekk Elias og Marius Jay si merksemd.

– Eg likar best å sjå monstertrucken og motorsyklane som kan hoppa langt, seier Marius Jay Dommernes.

Også Belinda Zalewsky, mor til Elias, er nøgd med showet.

– Eg syns dette er kjempegøy! seier ho til Strilen.

Glad for god respons
– Publikum i Noreg er meir entusiastiske enn i andre land me reiser i, kan Michael Lemoine fortelja.

Dermed hadde også Hot Wheel Brot­hers, som er i sin fjerde månad av Europa-turneen, det kjekt blant det hoiande publikummet i Knarvik.

– Me treng den gode respon­sen frå publikum for å gje litt ekstra fart på bana, seier Douglas Lemoine.

Sjølv om både Douglas og dei andre i Lemoine-familien treng støtta frå publi­kum, betyr ikkje det at dei er redde, trass i at dei har knekt både armar og bein tidlegare.

– Eg er ikkje redd når eg utfører stunt. Dette er det eg har vakse opp med sidan eg var seks år gammal, seier Douglas Lemoine til Strilen.