Å gjera opp status

Bedriftene skal telja opp kva varer dei har på lager, og får etter kvart fram rekneskap og resultat for året som gjekk. Også økonomien til den enkelte skal teljast opp. Om ein ikkje gjer det sjølv, så kjem det i alle fall brev frå bank og arbeidsgjevar, med summar for eitt og hitt i løpet av året som har gått. Her står det kor mykje som har gått til skatt, og kor mykje ein har betalt i renter på låna. Ut frå dette kan ei gle seg til å få pengar att på skatten, eller grua seg til restskatten.

Også for ei avis er nyttår ein god sjanse til å gjera opp status, og ikkje berre for det økonomiske. I ein avisredaksjonen vert det dagleg gjeve tilbakemeldingar, frå kollegaer, frå intervjua, frå aktørar med særlege interesser, og frå den jamne lesar.

Nokre er nøgde, nokre er mindre nøgde, og enkelte hadde helst sett at avisa prioriterte heilt annleis.

Dette er tilbakemeldingar som redaksjonen set pris på, også dei gongane det ikkje er skryt. Det betyr ikkje at me alltid er samde med dei som tek kontakt med oss, men det å få fram alternative syn og meiningar er ofte verdfullt i seg sjølv.

Me som jobbar i Strilen seier gjerne at me lagar lokalavis for folket i Nordhordland og Gulen. Men like mykje kan ein seia at me lagar avisa saman med alle som bur her. Avisa vert delvis til på grunnlag av tipsa som de lesarar kjem med. Og med dykk som velvillige intervjuobjekt, til alt frå Norom Brunæ til saker om økonomien i kommunane. Det er eit samarbeid som heldt fram også i det nye året.

Så er det ikkje sikkert at alle er meir nøgde om eitt år, når statusen skal gjerast opp på nytt. Men hugs i alle fall at dette er noko du sjølv kan vera med på å påverka.