Arrangement å satsa på

Blant aktivitetane er dykking, havrafting, jollesegling, jetski, vasscooter, havkajakk og segling i tilllegg til fiskeaktivitetar.  Aktivitetane går på dagtid, og på kvelden er det konsertar og sosiale aktivitetar.

På den første havsportveka den vesle øykommunen fekk i gang, var ikkje forventningane så store i høve til tilstrøyming. Men arrangørane kunne gleda seg over kring 2300 besøkjande. Kring 80 frivillige ordna med planlegging og gjennomføring. I godt vêr gjekk arrangementet over all forventning og vart ein suksess. Det viste seg at øykommunen hadde funne ei nisje som etter alle solemerke er liv laga å satsa vidare på. Me tvilar på at nokon vil prøva å «stela» opplegget.

Veka har også fått sitt internasjonale namn - «Nordic Oceansport Week». Det synest me er heilt flott og eigna til å trekkja besøkjande frå andre land. Havsportveka har si eiga friske heimeside og er også på Facebook og Twitter. Dersom ein googlar det ferske arrangementet, finn ein naturleg nok omtale i lokale media, men også i fagblad som Dykking og andre stader. Det er klare døme på at marknadsføringa av veka er god og har truffe mange aktuelle grupper. August er nok også ein grei månad for arrangementet, med god temperatur. Om det er sol eller regn er aldri lett å gå ut frå på Vestlandet. Men deltakarane treng ikkje sol og blå himmel for å trivast og få lyst til å koma tilbake.

 Å dra i gang og halda i gang lokale arrangement er viktig for reiselivet i alle regionar. Me håpar Havsportveka kjem godt ut økonomisk slik at ein kan halda fram. I startfasen er det viktig at kommunen ser eit ansvar for å bidra. Med synest grunnlaget for eit landskjend arrangement er lagt. At arrangørane har ambisjonane i orden er lovande. For kvifor skal ikkje Havsportveka verta like stor og kjend som Ekstremsportveko på Voss?