Bør velsignast

Forretningsbygget er flytta på langs av tomta. Det har også fått ein avstand på 60 meter til kyrkja, som både biskopen og andre instansar har sett som vilkår for ikkje å protestera mot planane. Det nye hovudbygget på tomta er utvida med ein etasje for å få plass til 12 leilegheiter på toppen.

Me trur det er fornuftig å satsa på planen, som no ligg ute til høyring. For kort avstand til kyrkja var eit ankepunkt mot den førre planen. Det er på sett og vis eit tankekors når kyrkja sine organ dei fleste stader ønskjer ein nærleik til eit pulserande senter. Ut frå teikningane vel me å konkludera med at den nye løysinga bør vera akseptabel for alle partar. Kyrkja sine folk bør også sjå mulegheiter i ei tomt som kan opna både for kyrkjelydshus og fleire parkeringsplassar. Dei som måtte vera skeptiske til planen, eller vil vita meir, vert oppmoda om å gå på det opne bygdemøtet på rådhuset om vel ein månad. Det er ein måte å påverka ein plan som kan verta godkjend av kommunestyret.

Ein potensiell leigetakar i eit nytt bygg på Manger, er Rema 1000, som treng større lokale. Alternativet ville truleg vera eit nybygg lenger borte frå dagens senter, noko me held fast ved ikkje er den beste løysinga. Manger senter er alt i dag såpass spreidd at det neppe nokon gong vert samla under eit glastak som til dømes i Knarvik eller Mastrevik. Når ein aktør gjev grunnlag for eit nytt forretningsbygg, bør kommunen så raskt som råd prøva å medverka til det. Leilegheiter på toppen vil høgst truleg styrkja prosjektet sin sjanse til å verta realisert. Kanskje andre bygg i senterområdet kan gå litt i høgda for å få nye leilegheiter? Fleire innbyggjarar sentralt på Manger tyder også fleire kundar både til etablerte og nye butikkar på Manger. Og det trengst.