Bruk luftrommet!

Den skal opp til ny første gongs behandling i Plan- og miljøutvalet komande onsdag. I september utsette dei «gamle» politikarane å leggja planen ut til offentleg høyring, og det same gjorde dei nyvalde politikarane i november.

Det nye utvalet vil sjå sentrumsplanen og tunnel Knarvik/Isdalstø i samanheng. Det synest me er fornuftig. Alt tyder på at denne tunnelen må koma, anten som del av ein ny bompengepakke eller ved ordinær løyving. Det har kome innspel om ny Skysstasjon der tunnelen kjem ut i Knarvik. Me synest også det er fornuftig. Lindås må setja inn ressursar på å få ein framtidsretta plan for dette området. Når dei fleste ser at utløpet av ein tunnel må koma her, krev det også riving av ein gammal og nedsliten barneskule som kommunen må erstatta.

Få og fylkeskommunen med på at den om lag like gamle «yrkesskulen» må rivast. Det vil opna eit stort areal i Knarvik der ein del går med til trafikkmaskin. Men det bør og vera plass for ny Skysstasjon, og høghus som kan innehalda næring og kontor for nye arbeidsplassar. Har Lindås ein klar plan, trur me private investorar vil sjå potensialet.

Ved dagens Skysstasjon ser fleire konsulentar i Bergen for seg at eksisterande bygg kan rivast. Det skal gje plass til det kulturhuset som Knarvik lenge har mangla. Sjølv om ei kombinert offentleg/privat satsing kan tenkjast, er me i tvil om kulturhus her er beste løysinga. Det kan vera realistisk ein gong i framtida, etter at Lindås er ferdig med å byggja skular for nokre hundre millionar.

Tomt for kulturhus må likevel på plass, i ein eller annan av fleire planar Knarvik er delt opp i. Om tomt vert avsett ved dagens Skysstasjon, er me redd det låser eit verdifullt område for lenge. Er kanskje Knarvikhøgda mellom den vidaregåande skulen og dagens barneskule stor nok til kulturhus og utviding av den vidaregåande skulen? Uansett må ein sentrumsplan opna for at større delar av luftrommet i Knarvik vert tatt i bruk, gjerne med bygg på opp til åtte-ni etasjar for kontor og bustader. Slike bygg treng ikkje påverka dagens bustadmiljø i Knarvik negativt, og kan gje plass for både nye innbyggjarar og arbeidsplassar som ein ny rapport for Bergensregionen ser grunnlag for.

På eitt eller anna tidspunkt må politikarane i Lindås ta steget og seia ja til at Knarvik skal verta ein småby