Ei bru for framtida

Brua betyr ei ny tid for ytre delar av Gulen. Om nokre månader skal brua opnast for trafikk, og ein epoke med ferjereiser er over. Ferjeleiet i Skipavik på Sandøy skal leggjast ned, og ferja over Fensfjorden vert ei rein pendelferje Sløvåg - Leirvåg.

Regionen vår har mange bruer, og Gulen har sin del av desse. Skipavik er ikkje det første ferjeleiet i ytre Gulen som er lagt ned. Også til Gråvika på Byrknesøy har det tidlegare gått ferje. Øyane i Gulen er bundne saman ei etter ei.

Der ein tidlegare måtte bla i ferjeruter, og kanskje leita etter overnatting i tilfelle siste ferja hadde gått, kan ein i dag kjøra over bruer frå øy til øy. Arbeidskraft, varer og turistar kan når den siste brua opnar, fraktast ferjefritt til og frå mellom øyane og resten av verda.

Brua vil ha gode ringverknader for folk i ytre Gulen. Serverings- og overnattingsstaden Skjerjehamn kan venta seg ein oppsving i gjestetalet, sjølv om storhendinga Utkant-festivalen alt i dag er så vellukka at det knapt er plass til fleire. Laks som skal frå Gulen og ut i verda vert ikkje avhengig av ferjetider. Allereie populære hytteområde vert nok meir populære når øyene ikkje har ein nattestengt veg, slik ferja i realiteten er.

På den andre sida medfører nye og betre kommunikasjonar også ei utfordring i det å halda aktivitet og busetnad oppe i ytre Gulen. For dei kommunale tenestene innan eldreomsorga, og på sikt også for til dømes ungdomsskuletrinnet, kan brua føra til ei sentralisering.

Kortare reisetid ut til øyane betyr også kortare reisetid andre vegen, og det opnar for samanslåing til færre og større einingar. Det er ei utvikling som øyfolket får med på kjøpet når brua opnar.