Einebustader er svaret

Utgangspunktet for den er ønskjet om eit lite bustadfelt i Risneskrisen. Det er eit innspel til den nye kommuneplanen som ordføraren og resten av styringsgruppa ikkje har funne plass til i første omgang. Ein av grunnane til det ser ut til å vera at området vil gripa inn i strandsona.

Den faktiske utviklinga viser at Radøy har om lag same folketalet i dag som for 20 år sidan. Ærleg talt er ikkje det så mykje å skryta av, når Radøy marknadsfører seg som ei grøn øy og ligg tett opp til dei to vekstkommunane Lindås og Meland.

Litt av svaret ligg i at politikarane på Radøy har vald å prioritera ein grøn profil ved å seia nei til mange søknader om å få byggja på strøtomter. Ikkje alle radværingar som flytta innover til Lindås er sinte på heimkommunen av den grunn – men nokså mange. Dette er ei prioritering Radøy har gjort.

Elles trur me kommunen bør leggja meir arbeid ned i å få til mindre, lokale byggjefelt. Det ei oppskrift Masfjorden har hatt suksess med i det siste. Men å få det til krev truleg meir enn fagre ord og rett farge i ein kommuneplan. Det kan krevja ei viss hjelpande hand økonomisk frå kommunen, ein politikk fleirtalet i kommunestyret må avklara om det er fleirtal for.

På Manger og i Austmarka har kommunen i stor grad stolt på private utbyggjarar. Så langt har det fungert best på Manger. Ved Sæbø-kyrkja står rekkjeleilegheiter som eit døme på eit prosjekt der ein privat utbyggjar knekte nakken. Den typen hus vil sikkert slå litt betre an i Austmarka Øvre, eit større område tett ved den nye Sæbø-skulen der oppstart har drege ut i tid og der Oddbjørn Tveiten valde å selja seg ut.

Men vårt tips er at tomter frå einebustader vil selja betre. Det kan henda prislappen for om­rådet så langt krev ei tettare utnytting, men kjem det då nok kjøparar? Me trur fleire tomter for einebustader er svaret om Radøy skal både behalda fleire av sine eigne innbyggjarar og få folk utanfrå til å slå til. Då må både administrasjon og politikarar koma meir på bana. Til no har begge partar vore for passive.