Eit løp for alle

Knarvikmila 2010 vart avvikla i strålande solskin, og heile Knarvik yra av liv både laurdag og søndag. Laurdagen starta med eit nytt tilbod. Saman med Nordhordland turlag laga Knarvikmila til «knøttemil» for dei aller yngste, ei løype på 300 meter inne på Knarvik stadion. Seinare laurdagen var det først minimil og seinare halvmaraton, og sjølve Knarvikmil-søndagen var det så naturløype, femkilometer og tikilometer. Når ein også tek med seg ungdomsløpet torsdag, for elevar i ungdomsskulen, vippar deltakartalet over imponerande sju tusen.

Det tradisjonsrike arrangementet fornyar seg stadig. Nytt i år var altså knøttemila, men også ein turmarsj frå Bryggen i Bergen via gamle ferdsleruter og nye bruer, til mål i Knarvik. 360 deltakarar på eit heilt nytt tilbod er bra, og lovar godt for neste år. Deltakartalet på 10-kilometer (464) og 5-kilometer (545) er også bra, og til det relativt ferske halvmaratonløpet var det i år 226 utøvarar som kom til mål. Halvmaratonløpet samlar deltakarar frå heile landet, og også frå utlandet.

Det er bra at folk kjem seg ut i løypene, anten det no er med eller utan tid. Det kan vera mange gode grunnar til å ikkje prøva seg på deltaking med tid, anten det er helsa som set grenser, eller ein har kanskje borna med seg på tur. Men for dei som har høve til det, er det ei fin utfordring å prøva seg på ein av «konkurransedistansane». Løpet er eit mål å trena til, og det er gjerne litt lettare å pressa seg når ein veit at klokka går.

Rundt kvart eit lunsjbord vert det snakka mykje om vekt, og alskens slankekurar verserer. Eit godt kosthald er sjølvsagt viktig, men like viktig er det å halda seg i aktivitet. I Knarvikmil-løpa var det også med deltakarar som ikkje alt er i toppform, men som nok brukar løpet som eit delmål på vegen for betre helse. Prestasjonen til dei som kjem sist, er gjerne ikkje mykje mindre enn for vinnaren. At løparar som brukar opp mot tre timar på halvmaraton kjenner seg velkomne i Knarvikmila, er eit teikn på at løpet verkeleg lukkast i å vera eit arrangement for alle.