Eit viktig og vanskeleg ansvar

Siste oppteljing viser at det «berre» er 50-60 born som treng plassar. Formannskapet sitt råd er difor å utsetja bygginga, som skal skje i privat regi på ei tomt kommunen eig.

I formannskapet hevda enkelte at det er pinleg at kommunen ikkje har betre oversikt over talet på barnehageborn. Den kritikken synest me er litt lettvint. Skal ein privat aktør investera i ein barnehage for 100 born, er det ei satsing der ein må vera sikker på grunnlaget. Då må det vera ein dialog mellom utbyggjar og kommunen. Når finrekning viser eit lågare barnetal, er det administrasjonen si plikt å varsla om dette. Like klart er det politikarane sitt ansvar å ta ei avgjerd.

Kvar enkelt kommune pliktar å stilla barnehageplass til born med lovfesta rett på plass. Det er ei kjerneoppgåve der ein ikkje må svikta. Det gjeld både kommunar som slit med fråflytting, og vekstkommunar, som me har begge deler av i vår region.

Meland sikra i fjor plass til alle som hadde lovfesta rett på plass. Samstundes har kommunen ei venteliste med born som per no ikkje har hatt slik rett. Behovet for fleire plassar kjem når desse borna vert eldre, og med tilflytting av nye barnefamiliar. I tillegg har Meland 34 born i barnehagar i andre kommunar.

Med det tempoet nye bustader vert bygde, tvilar me ikkje på at kommunen treng 100 nye plassar i løpet av eit par år. Formannskapet fekk opplyst at «Drømmehagen» ikkje kan byggjast i to steg. Ein nær føreståande søknadsrunde vil gje ein oppdatert peikepinn på behovet.

Kommunen må vera sikker på at det er plassar nok til dei med lovfesta rett. Og for born som ikkje har slik lovfesta rett, vil ein barnehageplass bety mykje for familiar der begge foreldra skal ut i arbeid etter endt permisjon.