Endeleg skjer det noko!

I neste veke skal formannskapet i Lindås finna kandidatar til ei tverrpolitisk arbeidsgruppe som skal sjå nærare på kulturhus i Knarvik. Gruppa skal leggja fram forslag på kor huset skal stå, og kva behov det skal dekkja. Saka skal opp i kommunestyret 16. september.

La det vera sagt med ein gong: Dette er eit viktig initiativ som gjer oss håpefulle. Knarvik vart utpeika som regionsenter i Nordhordland i 1965. I år er det faktisk 45 år sidan. Når ein ser på kva andre regionar har av kulturhus, vert me nokså flaue på vegner av både Lindås og nabokommunane. Likevel er det lite konstruktivt å gremma seg over det som ikkje har skjedd. Me gler oss i staden over at «storebror» Lindås no ser ut til å ha bestemt seg for å trakka til. Me helsar velkomen eit kulturhus i Knarvik,

Enkelte vil kanskje meina at det ikkje kan vera rett å leggja ned småskular og starta planlegginga av eit stort og kostbart kulturhus i Knarvik. Frå vår side synest me det vert feil tankegang. Knarvik treng eit spennande kulturhus med fleire funksjonar.

I første omgang vil me ikkje låsa oss til kva funksjonar som bør koma med. Me hadde håpt at Lindås kunne fått med nokre av nabokommunane, men er usikker på kor enkelt det vert. Men i praksis vil bygget, om det kjem, vert ei storsstove som mange i Nordhordland vil nytta seg av - kanskje som innbyggjarar av Nordhordland kommune om ti års tid.

Målet må vera å få eit hus opp før 2020. Når sentralt areal i knarvik snaret skal disponerast, er det nærmast livsviktig at kulturhuset får ei god og romsleg tomt. Lindås bør tenkja stort og spela på lag med både regionale og sentrale styresmakter.

Etter vår meining skadar det heller ikkje å vurdera om lokalt næringsliv har interesse av å gå inn med kapital som kan medverka til ei sunn økonomisk drift av huset.