Få det til!

Rådet går til fylkespolitikarane, som sit på pengesekken til kollektivtransporten. Dei vert bedne om offentlege midlar for å sikra den private drifta av båten som har starta opp på Knarvik-Frekhaug-Bergen. Spørsmålet vart teke opp som del av ei sak Samferdselsutvalet drøfta i går, og som går vidare til fylkesutvalet 26. januar.

Pendlarlaget sitt råd er forståeleg, men eitt av problema så langt er at det har kome færre brukarar enn ein håpa på. Forklaringane er fleire: Høgare billettpris enn med bussen, ingen samordna takst for dei som har løyst busskort, ingen buss til kaiane og at båten går til Nøstet og ikkje til sentrum.

I ettertid ser ein at dette har slått ut mot BNR, som vart pålagt å starta ruta dei hadde fått konsesjon for, men utan offentlege midlar. Det vert eit tilbakesteg for det lokale kollektivtilbodet om selskapet må avvikla ruta berre etter eit par månader. Me håpar difor det kan finnast dekning på fylkeskommunen sitt budsjett for vidare drift i 2012.

Argumenta mot å bla opp desse pengane er klare nok. Det viktigaste er at BNR har satsa på å driva ei kommersiell rute og ber om tilskot i etterkant. Det juridiske ser me ikkje som det største problemet – at BNR får ei rute med offentleg tilskot som ikkje har vore ute på anbod. Andre aktørar kan reagera på dette, men skal tilbodet verta vidareført, må det juridiske kunna koma på plass så raskt som råd, gjennom ein anbodsrunde.

Det avgjerande i denne saka er at tilbodet må få sjansen i meir enn to månader. Me håpar fylkesutvalet kan gjera godt nok politisk handverk til å få det til. Sjølv om kollektivtilbodet er fylket sitt ansvar, synest me og at Meland og Lindås kan vurdera kva dei kan bidra med i ein vanskeleg oppstartfase. Her må alle vera kreative. Om kommunane brukar nokre kroner i dag som påverkar talet på reisande positivt, kan det vera ei god investering for framtida.

Både søre delen av Lindås og Meland vil verta meir attraktive buområde for tilflyttarar, som ser at båt kan vera ein betre reisemåte for dei enn buss og privatbil.