For fort og lite planlagt?

Nye politiske vedtak gjer at ruta vert starta opp av det private selskapet BNR. Det som er klart, er at reisande i første omgang må betala meir enn det kostar med bussen til og frå Bergen.

Prisen er ein grunn til at me føler ruta startar på eit grunnlag som ikkje er det aller beste. Mangel på kortsamordning med buss er peika på frå det lokale pendlarlaget. BNR har ikkje bede om subsidiar frå det offentlege, men kompensasjon for det bussbilletten har vorte redusert med dei siste åra. Det har fylkespolitikarane litt skuffande sagt nei til.

Eit anna minus er at det ikkje har vorte tid til å setja i stand venteskuret på kaien i Knarvik. Dermed vil dei reisande her i første runde få tak over hovudet for verken heftig regn eller ein lun stad å venta når minusgradene måtte setja inn.

Eit tredje minus er mangel på tilbringarruter, også det trekt fram frå pendlarforeninga. Når pendlarane reagerer på det dei ser som sviktande tilrettelegging av båtruta, er det eit illevarslande teikn. Så vidt me kan sjå, er det politiske handverket for dårleg og prega av hastverk.

Difor er det spannade å sjå kva dei første vekene vil bringa av trafikk. Ei fersk brukarundersøking lovar godt. Svært mange er positive og seier dei vil bruka snøggbåten dersom den kjem tilbake.

No er tilbodet her raskare enn nokon kunne tru. Då er det berre å håpa det beste, og at ein del pendlarar vil prioritera båt sjølv om den er dyrare enn buss. Skulle BNR som privat aktør tapa på ruta, kan ingen forventa at selskapet vil halda fram særleg lenge. Me håpar det ikkje vil skje. Men skulle det skje, håpar me dette ikkje fører til at tilbodet støvar ned for mange år framover.

Bilkøar inn til Bergen må vera eit solid argumentet for at ein snøggbåt er liv laga. Går snøggbåten alt no i pluss, er ikkje noko betre enn det. Men også då bør ein lytta til pendlarane og prøva å få retta opp dei minusane som er peika på. På sikt må ein og vurdera om ei slik rute vil vera best tent med ein stoppestad i staden for både Knarvik og Frekhaug.