For lettvint

Tidlegare hadde kommunen bestemt at det å ta vare på kulturminna i området skulle vera eit kulturhistorisk satsingsområde. Kommunen og private skulle samarbeida om å setja i stand dei eldre bygningane. I den seinare tid har mykje stoppa opp, trass fine ord.

Frå vår side synest me vedtaket om sal er trist og ei falitterklæring i høve til det styrande organ i Meland har hatt som utgangspunkt. Holmeknappen er ein stad der det er gjort mykje for å ta vare på historia.  Først og fremst gjeld det Holmestova og Sjøbua.

På kaien har private medverka til å ta vare på miljøet frå tidlegare tider. I ein innflyttingskommune er det viktig å ha slike miljø, der innflyttarar og nye generasjonar kan læra om og oppleva «farne tider». Eit døme på det er at dampen «Oster» kan leggja til kai kvar haust og skapa ekstra stemning på Kystsogedagane. Fleirtalet i Meland slår fast at kommunen ikkje har lukkast og at det er på tide å gje andre sjansen. Det synest me vert litt for lettvint.

Me håpar at dei fleste politikarane i Meland er klar over at me er inne i Kulturminneåret. Eit hovudkjenneteikn er at det er kulturminna og aktivitetane rundt dei som skal stå i sentrum. Slik vert det ikkje for Sveitserhuset, som kommunen ikkje har klart å ta skikkeleg vare på.

For andre eldre bygg på Holme­knappen har også private fått sleppa til. I visse tilfelle kan det vera ein vellukka måte å verna kulturminne på. Eldsjeler eller driftige organisasjonar kan koma inn og gjera ein kjempejobb. Korleis det vil fungera i høve til Sveitserhuset, er det for tidleg å spå noko om.

Å annonsera huset for sal som einebustad med klausular for å sikra kulturminneverdien, er positivt nok. Men me kjenner oss meir usikre på utfallet enn om Meland kommune hadde trakka til og sagt at denne eigedomen tek me vare på for ettertida.

Det vert litt for lettvint å skulda på at kommunen har svak økonomi. Kommunar som satsar, kan og få økonomisk hjelp utanfrå. Me håpar Meland i den grad kommunen kan, bidreg til ei positiv utvikling vidare når det gjeld kulturminna på Holmeknappen.

Og me etterlyser meir ryggrad for framtida når det gjeld vedtak og lovnader som vert gjort for å ta vare på denne typen bygningsmiljø. Det gjeld til dømes vedlikehald, der også rike kommunar bør skjerpa seg.