Fortener god klaff

Bak arrange­mentet, som vert på ferjekaien, står Nordhordland Flyklubb og amcarklubben. Dei arrangerer dag for å setja fokus på alle typar luftsport og motorsport.

Å få forsvaret til Knarvik på oppvisning er stort – det er nesten ikkje til å tru, seier tre talsmenn for arrangørane når dei orienterer om arrangementet. Det har dei sanneleg rett i. Omtalen av programmet i Strilen førre laurdag viser at arrangørane har lagt seg i selen for å få til eit spennande program. Det viser også at dei har lukkast med å vera dristige.

Rett nok markerer forsvaret at det i år er 100 år sidan det første norske militærflyet tok av frå norsk jord. Men at ei av oppvisningane vert lagt til Knarvik, fortener arrangørane skryt for. Dei fortener òg god oppslutning om arrangementet, som har fått namnet «Wings and Wheels».

At folk som vil ha med seg denne opplevinga, vert inviterte til ferjekaien i Knarvik, synest me også er spennande. Denne delen av Knarvik har kome litt i skuggen dei siste 18 åra. Så mange år har det snart gått sidan Nordhordlandsbrua vart opna. Etter den tid har ikkje det store kaiområdet gjort så mykje nytte for seg.

Vegvesenet må ha området og ferjeleier i bakhand om brua skule verta stengd i ein lengre periode. Kaiane vert òg nytta av sirkus og av sandskøyter og andre fraktebåtar.

Me har ikkje noko svar på om arealet eller delar av det bør eller kan brukast til permanente bygg. Det burde gjerne vegvesenet og Lindås kommune avklara.

Dersom det går i orden med ny snøggbåtdrift, går me ut frå at dagens ventebygg bør fornyast og gjerne utvidast, og ein del av kaien må reserverast for pendlarparkering.

Men når kaiarealet i Knarvik ligg der, går me utifrå at det kan brukast litt meir aktivt enn i dag utan at det fører til ulemper for dei som bur i området.